اسلام آباد۔ 13مئی (اے پی پی) وزیراعظم محمد شہباز شریف معرکہ حق انا شہید آتے خراج عقیدت پیش کرسا پارینے کہ پاکستان نا فوج انا بہادر آفیسر و ورناک لمہ وطن نا دفاع کن قوم تون کروک آ قول ءِ پورو کریر، مچ آ قوم تینا شہید و اوفتا خاہوت آتیا گمر کیک۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم پارے کہ تینا بہادر گلزادہ غاتا قربانی تے قوم اسُل است آن دپک۔ وزیراعظم ارض وطن نا رکھ اٹی پاک فضائیہ نا 5 و پاک فوج انا 6 آفیسر و ورناتا شہیدی آ اوفتے نذرانہ عقیدت پیش کرے۔ وزیراعظم پارے کہ نن نئے بیرہ ملک انا پبی دفاع ءِ کرین بلکن پاکستان نا سالمیت و وتواجہی آ ہچ ءُ آنچ اس بننگ کن الیتون۔ وزیراعظم پارے کہ کنتون اوار مچ آ قوم تینا شہید و اوفتا خاہوت آتیا گمر کیک۔ تینا بہادر گلزادہ غاتا قربانی تے اسُل است آن دپک۔ وزیراعظم بھارتی جارحیت اٹی 15 کم سن چناو 7 زالبول آتون اوار 40 کودک مخلوق نا شہیدی آ ڈکھیائی و رنج انا درشانی ءِ کرسا پارے کہ نن وطن نا شہید آتے است آن درینن نئے دینہ و اوفتا خاہوت آتے تنیا اِلیپنہ۔ وزیراعظم پارے کہ شہداء پیکج نا پڑو ءِ کننگانے، شہید آتا خاہوت نا کفالت نا زمواری ریاست پبی وڑاٹ سرایتک۔ وزیراعظم شہید آتا درجہ غاتا بڑزی و اوفتا خاہوت کن صبر وجمیل نا دعاکرے۔ اوپارے کہ آپریشن’’بنیان مرصوص‘‘ بھارت ءِ پبی ورندی تننگا و اوڑآ پیدوار کننگاکہ اودے ڈیہہ اٹی ساڑی ایلو ملک آتا سالمیت و وتواجہی نا شرف ءِ کروئی مریک۔ معرکہ حق اٹی پاکستان نا فوج بھارت نا عددی برتری نا خوش گامی و غرور ءِ مش تا کرے۔ وزیراعظم معرکہ حق اٹی ٹھپی مروک آتا زوت دراخ جوڑی کن دعاکرے۔ اوپارے کہ نن پرامن قوم اسے اُن، ولے جارحیت نا ورندی ءِ تننگ چانہ و آپریشن’’بنیان مرصوس‘‘ اونا پیدوار شاہدی ءِ۔
