اسلام آباد۔ 13مئی (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ برآمد آتیا تالان شونداری نئے بیرہ اسہ اولیت اسے بلکن پاکستان نا زرگزرانی سوگوی وپائیداری کن اسٹ انگا عمل نا قابل کسر ءِ ، ملکی شونداری ٹی زرگزران نا ہر بشخ ءِ تینا کڑد ءِ ادا کروئی مریک، مالیاتی خڑچ آتا بڑزکوکچ، کبین توانائی، و پیچیدہ خراج نظام کون آ پنجرجاتی ویل آتے ایسر کننگ المی ءِ۔ اوداہیت ءِ سے شنبے نادے آ پنی آ صنعت کار و برآمد کنندگان آتا ڈل اتون اوڑدہی ٹی پارے۔ دااوڑدہی حکومت نا نجی بشخ و صنعتی برادری آن برجاسلابتی عمل نا بشخ ئس۔ وزیرخزانہ گپ وتران اٹی داہیت آ زور شاغا کہ برآمد آتیا تالان شونداری نئے بیرہ اسہ اولیت اسے بلکن پاکستان نا زرگزرانی سوگوی وپائیداری کن اسٹ انگا عمل نا قابل کسر ءِ۔ اوپارے کہ زرگزران نا ہربشخ ءِتینا کڑد ءِ ادا کروئی مریک۔ اوداہیت آ زور شاغا کہ پیدوار اٹی ودکی و جہانی منڈی تا کنڈآرجحان ءِ تینا کننگ المی ءِ تانکہ پاکستان وار وار انا زرگزرانی تنکی تیان پیش تمسا بیست ءُ پنچ می آئی ایم ایف پروگرام آن بچنگ کے۔ اوداہیت انا درشانی ءِ کرے کہ ساڑی آ تحفظاتی نظام ءِ چٹفوئی مریک تانکہ مسابقت آ تالان مارکیٹ ءِ مون آ دننگ مرے۔ اوپارے کہ بے گرج رکھ انا دور انا چٹفنگ المی ءِ۔ اوپارے کہ وزیراعظم جندی وڑاٹ داپالیسی اصلاحات نا چاروکی ءِ کننگ ءِ۔ وزیرخزانہ مستی پارے کہ مالیاتی خڑچ آتا بڑزکو کچ، کبین توانائی، و پیچیدہ خراج نظام کون آ پنجرجاتی ویل آتے ایسر کننگ المی ءِ تانکہ ہندی صنعت مسابقت نا قابل مننگ کے و ملک ءِ پیدواری و برآمد آتیا تالان شونداری نا کسر آ شاغنگ مرے۔ اوپارے کہ بروک آ بنجائی بجٹ ءِ اسہ حکمت عملی اسے آ تالان دستاویز نا وڑاٹ تیار کننگ انگ ءِ تانکہ مالی اولیت آتے پائیدار و برآمد آتیا تالان شونداری نا گیشتر مسخت آتون ہم گرنچ کننگ مرے۔ اوڑدہی ٹی حکومت نا ٹیرف اٹی اصلاحات ناپروگرام آ ہم گپ وتران مس، ہرانا مسخت دااڑاند آتے مر کننگ ءِ ہرا کاروباری سرجزآتیٹی مشکلات ودی کیرہ ۔ دیوان حکومت نا کوشست آتا ستاءِ کرے و پالیسی ٹی تسلسل و پیش بینی ءِ گچین کننگ کن نجی بشخ انا خیال آتے پیش کرے۔ سینیٹر اورنگزیب باوری کرفے کہ غٹ اسٹیک ہولڈر آتا سلاہ تے اصلاحات نا بروک آ ریسہ ٹی اوار کننگک۔ اواسہ سوگو، پیدواری و جہانی زرگزران اسے تون گنڈوک فریم ورک اسے نا ٹہیفنگ کن الس و نجی بشخ انا شریداری ءِ المی گوندا۔
