اسلام آباد۔ 13مئی (اے پی پی) بنجائی وزیر حوالکاری و شینکاری عطاء اللہ تارڑ پارینے کہ پاکستان و بھارت نا نیام اٹ جنگ بندی چندی ملک آتا گچین سفارتی کوشست آتا بھرم ءِ۔ سکائی نیوز ءِ تروک آ انٹرویو ٹی بنجائی وزیر حوالکاری پارے کہ وزیراعظم پاکستان امریکی صدر ڈونلڈ ٹرمپ نا خصوصی منت واریءِ ہرفینے ہرا بے چیٹی ءِ کم کرفنگ کن اہم کڑد ادا کرے۔ اوپارے کہ چین، سعودی عرب، متحدہ عرب امارات، ترکیہ و قطر ہم پاکستان و بھارت نا نیام اٹ جنگ بندی کن اہم سفارتی کڑد ادا کریر۔ اسہ سوج اسے آ بنجائی وزیر حوالکاری پارے کہ امریکی صدر نا کنڈآن جاری کروک ارٹ میکو ٹویٹ اٹی کشمیر نا ویل انا ایسری کن امریکی است خواہی نا پیدوار درشانی ءِ کننگانے۔ صدر ڈونلڈ ٹرمپ کشمیر نا ویل انا ایسری نا خواہندار ءِ۔ اسہ پین سوج اسے نا ورندی ءِ ترسا بنجائی وزیر حوالکاری پارے کہ بھارت پاکستان ءِ دِیر انا فراوانی ءِ داسکان بند کتنے و داوخت آ دِیر انا فراوانی معمول نا رداٹ برجاءِ۔ اونا پاننگ ئس کہ بھارت تون دِیر ءِ توننگ نا تکنیکی لائخی اف۔ پہلگام واقعہ نا سوج اٹی بنجائی وزیر حوالکاری پارے کہ پاکستان دااست ہسون واقعہ غا ڈکھیائی و ہمدردی نا درشانی ءِ کرے و شفاف جاست وپاست اٹی کمکاری نا پیشکش کرے ولے بھارت بیدس شاہدی آن پاکستان آدوبہ خلک۔ اوپارے کہ داتم اسکان بھارت اسہ ہم شاہدی اس پیش کننگ کتنے و نئے گروہ اس داواقعہ نا زمواری ءِ قبول کرینے۔ عطاء اللہ تارڑ مستی پارے کہ مقبوضہ کشمیر اٹی 7 لکھ بھارتی فوج انا ساڑی گری ٹی پہلگام کون آ واقعہ نا پیش بننگ بھارتی سیکورٹی و انٹیلی جنس نا بدترین بے سہبی ءِ و بھارت داواقعہ ءِ پاکستان تون گنڈنگ نا کوشست اٹ بھاز بے وڑ بے سہب مسنے۔ بنجائی وزیر حوالکاری پارے کہ جنگ بندی آن پد پاکستان وبھارت نا ڈی جی ایم اوز نا نیام اٹ اولیکو رابطہ مسنے۔ اسہ سوج اسے نا ورندی ٹی بنجائی وزیر حوالکاری پارے کہ پاکستان دہشت گردی نا برخلاف غٹ آن بھلا جنگ تننگ ءِ و دیکی سیم تیا دہشت گرد آتا برخلاف گچین کارروائی برجاءِ ۔ پاکستان دہشت گردی نا برخلاف جنگ اٹی بے گناہ شاری، ورناو آفیسر آتا جون تا قربانی تسنے۔ اوپیدوار کرے کہ پاکستان اٹی دہشت گرد گروہ تا ہ چءُ رکھ پناہ گاہ اس ساڑی اف۔ اسہ سوج اسے نا ورندی ٹی وزیر حوالکاری پارے کہ ساڑی جنگ بندی پاکستان نا نزوری اف بلکن اونا حکمت عملی و سفارت کاری نا سرسہبی ءِ۔ نن بھارتی فوجی تنصیبات ، سلہہ ڈپو و عسکری ہند آتے شست کرین وخت اس کہ بھارت نا نسخانک غٹ انا مون آٹی ءُ۔ اوپارے کہ بھارت پین بے چیٹی ءِ سگنگ نا پوزیشن اٹی الوکہ۔ اوپارے کہ مچ آ قوم پاکستان نا فوج اتون سلوک ءِ، پاکستان نا سرسہبی روز روشن آنبار پاش ءِ۔
