راولپنڈی۔ 13مئی (اے پی پی) بھارت نا جلہو آتیٹی سکوارڈرن لیڈر عثمان یوسف تون اوار 11 ورناتتون اوار 51 شاری شہید مسر۔ پاک فوج انا شعبہ تعلقات عامہ نا رداٹ معرکہ حق و وطن نا رکھ ءِ کرسا 11 ورناشہیدی نا جام ءِ نوش کریر وخت اس کہ بھارتی جارحیت نا ورندی ءِ ترسا 78 کارندہ ٹھپی مسر۔ بھارتی جلہو آتیٹی شہیدی نا جام ءِ کنوک آتیٹی پاک فضائیہ نا سکواڈرن لیڈر عثمان یوسف ، چیف ٹیکنیشن اورنگزیب، سینئر ٹیکنیشن نجیب، کارپورل ٹیکنیشن فاروق و سینئر ٹیکنیشن مبشر، نائیک عبدالرحمان ، لانس نائیک دلاور خان، لانس نائیک اکرام اللہ ، نائیک وقار خالد، سپاہی محمد عدیل اکبر و سپاہی نثارشہیدی نا جام ءِ نوش کریر۔ بھارتی فوج 6 و7 مئی آ بلااشتعال جلہو نا بناءِ کرے۔ داجلہو آتیٹی 40 شاری شہید مسر ہرافتے ٹی 7 زالبول و 15 چناہم اوار ئسروخت اس کہ 121 کودک شاری ٹھپی ہم مسر۔ جلہو آتیٹی زالبول، چناو پیرانگا تتون اوار کودک شاری تے شست کننگا، ٹھپی مروک آتیٹی 10 زالبول و 27 چناہم اوار ءُ، سنگین جارحیت نا ورندی ٹی پاک فوج معرکہ حق انا بیرک نا کیرغ پبی ورندی تس، آپریشن بنیان مرصوص نا کمک اٹ سہی و نمان ورندی جلہو کننگا۔ آئی ایس پی آر نا رداٹ شہید آتا عظیم قربانی و بدل مفروک حب الوطنی اسہ بے مٹ ءُ نشانی اسے، شہید آتا قربانی ءِ مدام یات تخنگک، قوم جارحیت نا مون آ سنبرینگوک ءِ۔ آئی ایس پی آر نا پاننگ ءِ کہ داٹی ہچ ءُ ابہام اس سلپ کہ پاکستان نا وتواجہی یا علاقائی سالمیت ءِ چیلنج کننگ نا ہرکوشست نا پبی و فیصلہ کن ورندی ءِ تننگک۔
