پشاور۔ 12مئی (اے پی پی) بنجائی وزیر و مسلم لیگ (ن) نا راہشون امیر مقام پارینے کہ پاکستان نا بھارت نا برخلاف گچین کارروائی دنیا غا دا پیدوار کرینے کہ پاک فوج اخہ در سوگو ولائخ ءِ۔ اونا پاننگ ئس کہ قومی و جہانی کہول آ پاکستان نا وقار بڑز مسنے۔ پشاور ہائیکورٹ بار ایسوسی ایشن نا اسہ دود اسے آن تران کرساامیر مقام پارے کہ پہلگام واقعہ نا بابت پاکستان دنیا ءِ آجولوز آتیٹی آجوانداز اٹ آجوجاست وپاست کرفنگ و تینا ہروڑنا کمکاری تننگ ناہم ہیت کرے۔ اوپارے کہ وزیراعظم ہم پیدوار موقف اس تینا کرے کہ دا واقعہ نا شفاف انکوائری ءِ کننگے تانکہ راستکی مون آ برے۔ بنجائی وزیر نا پاننگ ئس کہ بھارت دروغ دوبہ خلسا پاکستان ءِ بدنام کننگ نا کوشست کرے، ولے التا تینٹ دنیا نا مون آ بے نقاب مس، بھارت نئے بیرہ ایف آئی آر درج کرسا بدنامی نا گواچی مس بلکن جہانی کہول آ ہم اونا موقف نزور تما۔ امیر مقام داوخت آپارے کہ مچ آ پاکستانی قوم پاکستان نا فوج اتون یکجہتی نا درشانی ءِ کرے و دا سیوت ہی ننا غٹ انا بھلا واک ءِ اینو وخت ارے کہ نن غٹ اسٹ مرسا پاکستان کن سجفن و جندی فائدہ غاتیان ایڑترمرسا قومی سلامتی ءِاولیت ایتن۔ اوہائی کورٹ بار ایسوسی ایشن نا پوسکن گچین مروک آ کابینہ ءِ ہم مبارکبادی تس وپارے کہ وکلاء برادری مدام ملک ءِ آئینی تنکی تیان کشنگ اٹ اہم کڑد ادا کرینے۔ امیر مقام باوری کرفے کہ حکومت وکیل آتا ویل آتا ایسری کن ہرممکن کمک کیک۔
