لاہور۔ 12مئی (اے پی پی) بنجائی وزیر داخلہ محسن نقوی پارے کہ شہید آک قوم انا اصل ہیروک ءُ، بھارت نا برخلاف سرسہبی اوفتے شہید آتا دتر اٹ ملا، ننافوج دشمن ءِ ہندن ءُ سبخ اس تس کہ داسہ او پاکستان نا کنڈآخراب انگا نظر اٹ ہُننگ ناجیرت کننگ کپک، شہیدآتا قربانیک زیان مفسہ، حکومت شہید آتا خاہوت آتے تنیا اِلیپک۔ داخیال آتا درشانی ءِ او دوشنبے نادے آ ڈرون جلہو اٹی شہید مروک آ علی حیدر نا ہنکین واقع چونگی امر سدھو آ میڈیا تون غیررسمی گپ وتران کرسا کرے۔ داوخت آ سی سی پی او لاہور بلال کمیانہ و ایلوفک ہم ساڑی ئسر۔ بنجائی وزیر داخلہ پارے کہ مچ آ قوم فوج اتون ہم کوپہ دشمن ءِ دندان شکن ورندی تسر، بھارت داسہ ایڈونچر کننگ آن مست سد وار سجفک۔ اوپارے کہ ننے بھارت آن سرسہبی ننا شہید آتا دترآن ملانے، داشہید آتا قربانی تے زیان مننگ کن اِلنگ پننگک۔ داکان مست بنجائی وزیر داخلہ علی حیدر شہید انا باوہ محمد اسلم و لمہ شمیم بی بی تون ہڑزخواہی کرے و شہید انا درجہ غاتا بڑزی و بخشش کن دعاپاتیاکرے۔ بنجائی وزیر داخلہ محسن نقوی شہید علی حیدر نا لمہ و باوہ ءِدلاسہ تس و دلجوئی کرے وپارے کہ حکومت شہید آتا خاہوت آتے تنیا اِلیپک، نن شہید انا خاہوت آتون سلنہ، نما تنیا انگا سیبو ہنا، اللہ تعالیٰ نمے صبر وجمیل عطاکے، حکومت نما خاہوت نا سیبو مریک۔ یات سلے کہ شہید علی حیدر 8ایڑھ تا تنیا ایلم ئس، و پنڈی کرکٹ اسٹیڈیم نا پیشن برگرنا کاروبار کریکہ ہراتدوک آ دے راولپنڈی اسٹیڈیم اٹی بھارت نا کنڈآن ڈرون جلہو اٹی شہید مسوسس۔
