اسلام آباد۔ 06مئی (اے پی پی) بنجائی وزیر حوالکاری و شینکاری عطاءا للہ تارڑ پارے کہ سیاسی اختلاف آتا ملکی دفاع و خارجہ پالیسی تون ہچ ءُ تعلق اس اف، پاکستان نا سالمیت نا باندات آک ہروڑنا سیاست آن ایڑترءُ، بھارت ءِ بیانیہ نا جنگ اٹی شکست مسنے، اینوگجرات نا قصاب نا غٹ پالیسیک بے سہب مسنو، دشمن مکار، بدنیت و بے وقوف ءِ، دشمن بیوقوف متوکہ تو پہلگام فالیس فلیگ نا ڈٹ بندی ءِ گڑاس جوان کریکہ، مودی نا مکروہ دروشم مچ آ دنیا نا مون آ بے نقاب مسنے۔ سے شنبے نادے آ قومی اسمبلی دیوان اٹی گپ وتران کرسا بنجائی وزیر حوالکاری پارے کہ دشمن موقع نا تاڑاٹی  ءِ کہ چوخت پاکستان آ جلہوکے۔اوپارے کہ کنا پاکستانیت داگواراکپک کہ دایوان آن ہندن ءُ نعرہ خلنگے ہرا بھارت تینا میڈیا غا نشان ترسا تاثرایتے کہ پاکستانی قوم داخلی وڑاٹ بشخوک ءُ۔ اوپارے کہ اینو باندات بیرہ پاکستان نا ءِ، تین پہ تینی اختلافات و سیاست کن پین وخت ہم ارے۔ اوپارے کہ جنرل ایوب خان نا لوزہ آک اینو ہم ننا است آتیٹی زندہ ءُ کہ دشمن ءِ اندازہ الوکہ کہ او ہراقوم ءِ ہکل تسنے۔ ہندا ہموولولہ و جوزہ ءِ ہرا مدام داقوم انا پہچان مسنے۔ عطاء اللہ تارڑ پارے کہ اینو گجرات نا قصاب نا غٹ پالیسیک بے سہب مسنو۔ تدوک آ دے لائن آف کنٹرول نا خڑک بیلانور شاہ نا ہند آ ملکی و درملکی میڈیا ءِ دورہ کرفنگا۔ بھارت دادعویٰ کرساکرینے کہ داڑے دہشت گرد آتا ہیلکاری کیمپ ساڑی ءِ و پیر چناسی و بیلانور شاہ نا کمک اٹ دہشت گرد آک سیم آن ایپار کارہ ۔ اوپارے کہ ننا دشمن بیرہ مکار اف، بلکن بدنیت و بے وقوف ہم ارے۔ اونا بے وقوفی نا مثال دادے کہ پہلگام نا علاقہ سیم آن 150 کلومیٹر مُر ءِ۔ داوڑاٹ دادعویٰ امر ممکن ءِ کہ کس اس ہمونگیا ہنسا جلہو کے؟اوپارے کہ بے گناہ کشمیری تے زندان آن کشسا شہید کننگ انگ ءِ۔ ہفت دہائی آن بھارتی فوج مظلوم کشمیری تیا ظلم کننگ ءِ۔ ہموڑے پاکستانی بیرک ءِ چست کننگ آ پابندی آن پدہم کشمیری زالبول آک تینا شہید آتے سوز ہلالی بیرک اٹ دفن کیرہ۔ داجوزہ ہراکان بریک؟’’پاکستان نا مطلب انت، لاالہ الااللہ ‘‘ نا نعرہ نا توار ہم اینووادی ٹی پِننگ ءِ ۔ عطاء اللہ تارڑ پارے کہ پہلگام پولیس سٹیشن اٹی نوشتہ کروک ایف آئی آر تینٹ بھارت نا دعویٰ ءِ بے نقاب کیک۔ واقعہ نا بیرہ 10منٹ آن پد ایف آئی آر نوشتہ کننگا وخت اس کہ پولیس یک و نیم گھنٹہ غان پد واقعہ نا جاگہ غا سرمس۔ داعلاقہ نا خڑک فوجی یونٹ ہم ارے ہرافتا غٹ تر چکار اوڑاٹی ءِ کہ کشمیری تیا ہراوڑ ظلم کننگے۔ اوپیدوار کرے کہ پہلگام نا واقعہ بھارت نا فالس فلیگ آپریشن ئس ہرا سیکورٹی و انٹیلی جنس نا پورو بے سہبی ءِ۔ دا بی جے پی نا بہار اٹی گچین کاری عزم و پاکستان نا ودوک آ زرگزرانی شونداری ءِ توننگ نا سازش ءِ۔ اوفتا خیال ئس کہ فالس فلیگ آپریشن آن مسخت دوئی مریک، ولے ایف آئی آر ہی غٹ حقیقت آتے پاش کرے۔ اوپارے کہ وڈیو ٹی صاف خننگک کہ زپ لائن آ نشان تروک آ بندغ بے خوفی اٹ حرکت کننگ ءِ ، دامون ایمون مخلوق آزاد پیری کُننگ ءُ۔ دعویٰ کننگاکہ دہشت گردآک بلااشتعال سم کاری کریر و بیرہ ہندوتے شست کریر ہراسراسر دُروغ ءِ۔ داواقعہ ٹی اسہ مسلمان اس ہم زوال کرے۔ اگہ واقعی سم کاری مسکہ تو زپ لائن آ ساڑی بندغ داخہ درآسانی اٹ امر پیش تماکہ؟ بنجائی وزیرپارے کہ پاکستان بیانیہ و سفارتی کہول آ بھارت ءِ ہندن ءُ شکست اس تسنے ہرااونا بروک آ چینک ہم یات تخرہ۔ جہانی میڈیا ادارہ کون آالجزیرہ، نیویارک ٹائمز و اکانومسٹ آک ہم داپاننگ ءُ کہ بھارت تون داواقعہ ٹی پاکستان نا اوار مننگ نا ہچ ءُ شاہدی اس اف۔ اوپارے کہ پاکستان ساف ءُ موقف اس تینا کرینے اگہ ننا دِیر انا مون ءِ اسہ کنڈ کننگ نا کوشست کننگاتو پبی وفیصلہ کن ردعمل تننگک ولے اوڑتون اوار داہم پارے کہ ننا دُوک ساف ءُ، پہلگام واقعہ نا شفاف و بے کنڈ ہلوک جاست وپاست کننگے تانکہ اصل راستی دنیا نا مون آ برے۔ اوپارے کہ تدوک آ 48 گھنٹہ ٹی پاکستان سفارتی رابطہ غاتے ترندکرے۔ وزیراعظم چین، برطانیہ، ترکیہ ، سعودی عرب، یواے ای و کویت نا سفیر آتون اوڑدہی کرے، امیر قطر، ایرانی صدر و وزیرخارجہ تون ہم ہیت مس و اقوام متحدہ نا سیکرٹری جنرل تون ٹیل فون آ ہیت کننگا۔ بنجائی وزیر پارے کہ پاکستان دامقدمہ ءِ اقوام متحدہ نا سلامتی کونسل اٹی ہرفے و دنیا ءِ پارے کہ پاکستان کشمیری الس نا اخلاقی، سیاسی و سفارتی مخ تفی ءِ برجاتخک۔ کشمیر ننا شہ رگ ءِ ۔ اگہ بھارت دا سمجھک کہ داوڑنا کارروائی تے اٹ جہانی چکار ءِ کشمیرآن اینک کیک تو او غلط گمانی ٹی ءِ۔ بنجائی وزیر حوالکاری پارے کہ پاکستان دہشت گردی نا برخلاف فرنٹ لائن ریاست ءِ۔ نن دہشت گردی نا برخلاف جنگ کرین، قربانی تسن و اینو ہم دنیا و دہشت گردی نا نیام اٹ اسہ دیوال اسے آنبار سلوک اُن۔ دہشت گردی نا شست ہم نن مسن، جنگ ہم نن کرین و دوبہ ہم ننے آ؟ بھارت ءِ شرم برے۔ اوپارے کہ بھارت تینٹ اسہ ہندن ءُ ریاست اسے ہرا سکھ آتا خون ءِ کرفک۔ سکھ برادری ساف پڑو کرے کہ او پاکستان نا برخلاف جنگ کپسہ۔ کینیڈا ٹی ہردیپ سنگھ نجر نا خون، امریکہ و آسٹریلیا ٹی سکھ راہشون تیا جلہو بھارتی ریاستی دہشت گردی نا مظاہر ءِ۔ اوپارے کہ بھارت تینٹ دہشت گردی ٹی اوار ءِ، پاکستان تون بھارتی نیول کمانڈر کلبھوشن یادیو نادروشم اٹ ناقابل تردید شاہدی ساڑی ءِ۔ بنجائی وزیر حوالکاری پارے کہ جعفر ایکسپریس واقعہ نا فوٹیج غٹ آن مست بھارتی چینل ءِ امرملا؟اوپارے کہ بی ایل اے نا تانہ بانہ بھارت تون گنڈوک ءِ، دُن انگا ملک ءِ انت حق اس کہ او پاکستان آ دہشت گردی نا دوبہ خلے؟ نن دہشت گردی نا برخلاف جنگ اٹی 90 ہزار جون تے ندرکرینن، دنیا ٹی اونا درور ملیپک۔ اوپارے کہ پاکستانی قوم عظیم ءِ، ہراتم دا بش مریرہ تو بھلاآن بھلا دشمن ہم شکست کُنیک۔ بھارت نا ریاستی دہشت گردی کیہی دہائی آن برجاءِ۔ رانا ایجنٹ آک پاکستان اٹ دہشت گردی کرفنگ ءُ، کودک جون تے ہلنگ انگ ءِ۔ اوپارے کہ پاکستان نا فوج، پولیس، سیکورٹی ادارہ و سیاست دانک تینا جون تے ندر کریر ولے وخت اس ہم شکست ءِ تسلیم کتور۔ ہرتپہ دہشت گردی نا برخلاف قربانی تس۔ داسہ بھارتی الس مودی حکومت آن سوج کننگ ءِ کہ 9 لکھ فوج کشمیر اٹی انت اکن تعینات ءُ؟بھارت نا سفارت کاری انت اکن بے سہب مس؟ اوپارے کہ بھارت بند گلی ٹی پترینگ انگ ءِ و ہروخت پاکستان آ جلہو نا ڈٹ بندی کیک ۔ اگہ داوار بھارت جارحانہ گام اس ہرفے تو ہندن ءُ پبی ورندی اس تننگک ہرانا تاریخ اٹی درور ملیپک۔ پاکستان وخت اس ہم پہل کتنے، ولے اگہ دشمن پیش گامی کرے تو ولدا اودے ہندن ءُ ورندی اس تننگک کہ اونا بروک آ چینک یات تخرہ۔ اوپارے کہ مچ آقوم پاکستان نا فوج اتون ہم کوپہ سلوک ءُ۔ بھارت ننا سوشل میڈیا اکاؤنٹ آتے بند کرے تو نن اسہ نغمہ اس تیار کرسا بھارتی یوٹیوب چینل آتیا بطور اشتہار چلیفین۔ ہندن کہ نن پہلگام واقعہ نا شفاف جاست وپاست نا ہیت ءِ کرین تو بھارت نا نک لڑزنگ نا بناءِ کرینو۔

متعلقہ مضامینمصنف کی طرف سے مزید