آبادی آ قومی ایکشن پلان نا سرسہبی اٹ نفاذ المی ءِ، قائم مقام صدر مملکت سید یوسف رضاگیلانی

اسلام آباد۔ 14 مارچ (اے پی پی) قائم مقام صدر مملکت سید یوسف رضاگیلانی آبادی ٹی خطرناک حداسکان ودکی نا گچین بست وبند کن مربوط کوشست آتا گرج آ زور شاغسا پارینے کہ آبادی آ قومی ایکشن پلان نا سرسہبی اٹ نفاذ المی ءِ۔ ایوان صدر نا پریس ونگ انا رداٹ قائم مقام صدر مملکت داخیا ل آتا درشانی ءِ جمعہ نادے آ داڑے آبادی نا بست وبند انا بابت دیوان نا کماشی ءِ کرساکرے۔ دیوان سپریم کورٹ نا 2018ء نا سوموٹوایکشن و اسیجائی مفادات کونسل نا سفارشات آتا پس منظر اٹی مس۔ دیوان اٹی سیکرٹری وزارت جان جوڑی ، ڈائریکٹر جنرل پاپولیشن ونگ و وزارت جان جوڑی نا بڑزکو کمامدارآک بشخ ہلکر۔ قائم مقام صدر مملکت پارے کہ آبادی نا چیلنج نا بارواٹی آگاہی ودی کننگ کن صوبائی حکومت و نجی بشخ آتون اوار غٹ اسٹیک ہولڈر آتے اوار کننگ نا گرج ءِ۔ سید یوسف رضاگیلانی آبادی ٹی ودکی نا کچ ءِ ککم کننگ و آبادی نا ایلو تعلقدار ٹک آتے گچین کننگ تون اوار خاہوتی ڈٹ بندی نا خذمت اسکان مخلوق نا رسینگ ءِ ودفنگ نا گرج آ ہم زور شاغا۔ اوپارے کہ ودوک آآبادی ءِ کنٹرول کننگ کن مربوط و اجتماعی کوشست آتون اوار اوار دا چیلنج تون مون تننگ کن صوبہ غاتا کمک المی ءِ۔ قائم مقام صدر مملکت پارے کہ آبادی ا آزاد جموں وکشمیر و گلگت بلتستان تون اوار صوبائی حکومت آتا سلابت المی ءِ۔ دیوان اٹی قائم مقام صدر یوسف رضاگیلانی ءِ آبادی نا بابت نیشنل ایکشن پلان آ حوال تننگا۔ حوال اٹی پاننگاکہ 2019ءآن 2024ء اسکان آبادی نا بابت نیشنل ایکشن پلان آ عملدرآمد کننگا وخت اس کہ 2025ء آن 2030 ء اسکان آبادی نا بابت نظرثانی مروک نیشنل ایکشن پلان صوبہ غاتا سلابت اٹ تیار کننگانے۔ حوال اٹی مستی پاننگاکہ پوسکن آ ڈٹ منظوری نا چاری ءِ و اوڑآآبادی نا بابت بنجائی ٹاسک فورس انا بروک آ دیوان اٹی سجفنگک۔