اسلام آباد۔ 14 مارچ (اے پی پی) بنجائی وزیر واپار جام کمال خان تینا سرکاری دورہ ءِ عمان اٹی انویسٹ عمان لاؤنج نا دورہ ءِ کرے۔ جمعہ نادے آ وزار ت واپار نا داڑے جاری اعلامیہ نا رداٹ دالاؤنج اسہ مرکزی پلیٹ فارم اسے نا وڑاٹ کاریم کیک ہراڑے زرکاری نا وارخواہی پیش کننگک، زرکارآتیکن آسراتی فراوان کننگک و داوڑنا زرگزرانی ڈٹ آتے نمان کننگک ہراہندی و درملکی زرکاری ءِ مون آدننگ اٹ کمکار مریرہ۔ دورہ ٹی بنجائی وزیر ءِ زرکاری نا وڑوڈول ، تعلقدار سرکاری ادارہ، دوئی آسودہی و عمان نا چندی اقتصادی بشخ آتیٹی ساڑی بھلا وارخواہی تا بارواٹی سرجمی اٹ حوال تننگا۔ انویسٹ عمان نا کمامدارآک عمان نا زرکاردوست پالیسی و درملکی زرکاری نا مون آ دننگ کن تینا کروک آسان و گچین وڑوڈول ءِ مون آ تخار۔ بنجائی وزیر جام کمال خان انویسٹ عمان نا منظم وڑوڈول انا ستاءِ کرے وپارے کہ داپاکستان نا ون ونڈو فیسلیٹی نا پوسکن آ ورژن ءِ ہرا زرکارآتے اسہ جاگہ غا غٹ آسراتی تے فراوان کننگ نا اصول آ تالان ءِ۔ اوانویسٹ عمان و عمان انویسمنٹ اتھارٹی نا پاکستان نا اسپیشل انویسٹمنٹ فیسلی ٹیشن کونسل تونشریداری نا گرج آ زور شاغا تانکہ ہڑتوم آ کنڈآتا زرکاری ءِ پین مون آ دننگ مرے۔ دادورہ پاکستان و عمان نا اسیجائی عزم انا عکاسی ءِ کیک ہرانا مسخت زرکاری نا تعلقداری تے سوگو کننگ و ادارہ جاتی کہول آ اقتصادی کمکاری ءِ مون آدننگ ءِ۔
