اسلام آباد۔ 14 مارچ(اے پی پی) وزیراعظم محمد شہباز شریف پارینے کہ گوازی گر آتے ہروڑنا آسراتی و وسیلہ غاتا فراوانی حکومت نا اولیت ءِ، ملک انا پنی آ گوازی گر آتے اوفتا لائخی تا رداٹ سرکاری ادارہ غاتیٹی ملازمت تننگک۔ اوداخیال آتا درشانی ءِ جمعہ نادے آ داڑے ہنگوآن تعلق تخوک آ فٹ بال نا گوازی گر محمد ریاض تون گپ وتران کرسا کرے۔ اوڑدہی ٹی بنجائی وزیر عطاء اللہ تارڑ، شزہ فاطمہ خواجہ، سلاہکار وزیراعظم رانا ثناء اللہ، چیئرمین وزیراعظم یوتھ پروگرام رانا مشہود احمد خان و میڈیا کوآرڈی نیٹر بدر شہباز وڑائچ ئسک ہم ساڑی ئسر۔ وزیراعظم فٹ بالر محمد ریاض نا زرگزرانی تنگدستی نا نوٹس ءِ ہلسا اودے وزیراعظم آفس آ بٹنگا۔ محمد ریاض ءِ 25 لکھ روپئی نا کمکی چیک اس تس و ملازمت نا ہم بست وبند کرے۔ وزیراعظم پارے کہ لائخ آ ورناک قوم انا ہیرو و محمد ریاض کون آ گوازی گر ننا سرمایہ غاک ءُ، پاکستانی گوازی گر آتے ہروڑنا آسراتی و اوفتے جہانی کہول آ مسابقت کن وسیلہ غاتا فراوانی حکومت نا اولیت آتیٹی اوار ءِ ، نی قوم انا ہُشار گوازی گر اُس و نا ٹیلنٹ ءِ زیان مننگ کن الیپنہ۔ وزیراعظم محمد ریاض ءِ گوازی ءِ برجاتخنگ و پاکستان اٹ فٹ بال نا مون آدننگ کن فعال کڑد ادا کننگ نا پارت کرے۔ وزیراعظم پارت کرے کہ محمد ریاض ءِ اونا پسند نا بنجائی ادارہ سے ٹی ملازمت تننگے۔ اوپارت کرے کہ ملک اناپنی آ گوازی گر آتے اوفتا لائخی نا رداٹ سرکاری ادارہ غاتیٹی ملازمت تننگے، ملک اٹی گوازی تا مون آ دننگ کن گام گیج آتے ترند کننگے، جہانی کہول آ پاکستان نا نمائندگی ءِ کروک آ گوازی گر آتا آسودہی و اوفتے روزگار نا پائیدار وارخواہی فراوان کننگ کن حکمت عملی اس ٹہیفنگے۔ وزیراعظم پارے کہ ورنا ک گوازی و ایلو جان جوڑ سرجزآتیٹی زیات آن زیات بشخ ہلیر۔ وزیراعظم محمد ریاض ءِ 25 لکھ روپئی نا چیک اس پیش کرے۔ محمد ریاض وزیراعظم نا کنڈآن مالی کمکاری و گوازی گر آتا راجی آسودہی  گوازی تا شون تننگ کن گام گیج آتیا وزیراعظم شہباز شریف نا منت واری ءِ ہرفے۔ محمد ریاض 2018ء نا ایشیائی گوازی تیٹی پاکستان نا نمائندگی ءِ کرے و او جہانی کہول آ چندی کلب آتا کنڈآن گوازی کرسا کرینے، داکان بیدس چار انڈر 23 مقابلہ غاتون اوار 14 جہانی مقابلہ غاتیٹی پاکستان نا نمائندگی ءِ کرینے ۔ 29 سال انا فٹ بالر محمد ریاض نا جلیبی بہا کننگ نا ویڈیو سوشل میڈیا غا وائرل مسوسس اوکان پد وزیراعظم اودے اوڑدہی کن وزیراعظم ہاؤس آ بٹنگسا است بڈی ءِ کرے۔

متعلقہ مضامینمصنف کی طرف سے مزید