اسلام آباد۔ 14 مارچ (اے پی پی) وزیراعظم محمد شہباز شریف ملک آن دہشت گردی نا عفریت نا چٹفنگ کن پاکستان نا پکا عزم انا درشانی و پاکستان و یورپی یونین نا نیام اٹ کمکاری و شریداری ءِ پین سوگو کننگ نا است خواہی نا درشانی ءِ کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ اوداخیال آتا درشانی ءِ یورپی یونین نا سفیر ڈاکٹر رینا کیونکا تون گپ وتران کرسا کرے ہراوزیراعظم تون اوڑدہی کرینے۔ وزیراعظم بلوچستان اٹی جعفر ایکسپریس ٹرین آ ساڑی آ دہشت گردانہ جلہو آ ہڑزخواہی کننگ آ یورپی یونین نا سفیر نا منت واری ءِ ہرفے و ملک آن دہشت گردی نا عفریت نا چٹفنگ کن پاکستان نا پکا عزم انا درشانی ءِ کرے۔ وزیراعظم پارے کہ پاکستان و یورپی یونین نا نیام اٹ متکن آ دوستانہ تعلقداری ءِ و داتعلقداری ٹی مثبت پیش رفت آ است جمی نا درشانی ءِ کرے۔ اوپاکستان نا یورپی یونین تون کمکاری آ تالان شریداری خاص کر جی ایس پی پلس اسکیم ہرابناغان ہی پاکستان و یورپی یونین ءِ پبی فائدہ تس ، ءِ پین سوگو کننگ نا است خواہی نا درشانی ءِ کرے۔ اوڑدہی ٹی انسانی حق اتون اوار پاکستان ویورپی یونین نا تعلقداری نا چندی پلو آتیا گپ وتران کننگا۔ وزیراعظم مئی ٹی اسلام آباد اٹی اڈ ہلوک اولیکو پاکستان۔یورپی یونین نا بڑزکو کہول انا بزنس فورم نا اڈتننگ نا خیرمقدم ءِ کرے و یورپی یونین نا سفیر ءِ دا فورم نا سرسہب کننگ اٹ پاکستان نا پوروکمکاری و آسراتی نا باوری کرفے۔ یورپی یونین نا سفیر وزیراعظم ءِ یورپی یونین نا ڈل آتا پاکستان نا ساڑی آ دورہ غاتون اوار اوار بروک آ دورہ غاتا بارواٹی ہم معلومدار کرے۔
