اسلام آباد۔14مارچ (اے پی پی): مزن وزیر محمد شہباز شریف ءَ گوشت کہ ایتھلیٹ آناں ھمک رنگ ءِ آسراتی ءُ وسیلگ پھجاری حکومت ءِ اولی ترجی انت ملک ءِ نامداریں ایتھلیٹ آناں وتی توانائی ءِ رد ءَ سرکاری ادارگ آنی تہ ءَ نوکری دیگ بیت۔ اے ھیالانی درشانی آئی ءَ جمعہ ءِ روچ ءَ ھانگو ءِ فٹبالر محمد ریاض ءَ گوں گپ ءُ تران کنان ءَ کت۔ گند ءُ نند ءَ بنجاھی وزیر عطا اللہ تارڑ، شزہ فاطمہ خواجہ، مزن وزیر ءِ مشیر رانا ثنا اللہ، چیئرمین مزن وزیر ءِ ورنا پروگرام رانا مشہود احمد خان ءُ میڈیا کوآرڈینیٹر بدر شہباز ورائیچ ھم ھوار اتنت۔ مزن وزیر ءَ فٹبالر محمد ریاض ءِ مالی گر ءُ دار ءِ نوٹس زرتگ ءُ مزن وزیر کارگس ءَ دعوت داتگ۔ محمد ریاض ءَ را دو ءُ نیم کلدار ءِ ریلیف چیک دیگ بوتگ ءُ نوکری ھم داتگ۔ مزن وزیر ءَ گوشت کہ راج ءِ باصلاحیتیں ورنا بامرد ءُ محمد ریاض ءِ وڑیں لیبی مئے مڈی اَنت پاکستانی لیبی آناں میاں اوستمانی تک ءَ مقابلہ کنگ ءِ واستہ ھمک رنگ ءِ آسراتی پجارینگ حکومت ءِ اولی ترجی آنی تہ ءَ ھوار اِنت۔ مزن وزیر ءَ محمد ریاض ءَ را گیم ءَ برجاہ دارگ ءُ پاکستان ءَ فٹبال ءِ دیمروئی ءِ واستہ سرگرمیں کرد پیلو کنگ ءِ واستہ دلبڈی دات۔ مزن وزیر ءَ پنت ءُ شون کت کہ محمد ریاض ءَ را آئی ءِ پسند ءِ بنجاھی ادارگ ءَ نوکری دیگ بہ بیت۔ مزن وزیر ءَ گوشت کہ ورنا لیب ءُ جان سلامتی ءِ ایندگر چست ءُ ایر آنی تہ ءَ سرگرمی رنگ ءَ بھر زوری بہ کن اَنت۔ مزن وزیر ءَ محمد ریاض ءَ را دو لکھ ءُ نیم کلدار ءِ چیک دات۔ محمد ریاض ءَ مزن وزیر شہباز شریف ءِ شگر ءُ منت گپت کہ آئی ءَ مزن وزیر ءَ لیب کنوک آنی گہبود ءُ لیب ءُ گوازی ءِ دیمروئی ءِ واستہ مالی کمک ءُ گامگیج کتگ۔ محمد ریاض ءَ 2018 ءِ ایشیائی گیمز ءَ پاکستان ءِ نمائندگی کتگ ءُ آئی ءَ میاں اوستمانی تک ءَ جتا جتائیں کلب آنی واستہ لیب کتگ ایشی ءَ ابید 14 میاں اوستمانی مقابلہ آنی تہ ءَ پاکستان ءِ نمائندگی کتگ ایشی ءِ تہ ءَ چار انڈر 23 مقابلہ ھوار اَنت۔ سوشل میڈیا ءِ سر ءَ 29 سالی فٹبالر محمد ریاض ءِ جلیبی ءِ بہا کنگ ءِ ویڈیو وائرل بوتگ ایشی ءَ پد مزن وزیر ءَ آئی ءَ را مزن وزیر گس ءَ گند ءُ نند ءِ واستہ دعوت داتگ ءُ دلبڈی داتگ۔
