بیجنگ۔12مارچ (اے پی پی): چین ءَ پاکستان ءِ صوبہ بلوچستان ءَ جعفر ایکسپریس ءِ سر ءَ ناشرکاری اُرش ءِ تچکیں مذمت کتگ ۔ چین ءِ دری کارانی وزارت ءِ جارکش ماؤ نینگ ءَ چار شمبے ءِ روچ ءَ روٹین بریفنگ ءِ ساھت ءَ ناشرکاری ءِ ھلاپ ءَ جنگ، یکوئی ءُ چاگردی استحکام ءِ برجائی ءُ شہری آنی رکھینگ ءِ تہ ءَ پاکستان ءِ سرجمیں کمک ءِ برجاہ دارگ ءِ جزم ءِ درشانی کتگ۔ ٹرین ءِ اُرش ءِ ھوالگ ءَ جُست ءِ پسو ءَ آئی ءَ گوشت کہ ما ھال آنی سر ءَ دلگوش داتگ ءُ اے ناشرکاری اُرش ءِ سک باز مذمت کن ایں ۔ آئی ءَ گوشت کہ چین کجام ھم رنگ ءِ ناشرکاری ءِ مھکمیں مخالفت کنت۔ آئی ءَ گیش گوشت کہ ما ناشرکاری ءِ ھلاپ ءَ جنگ، یکوئی ءُ چاگردی استحکام ءِ برجائی ءُ شہری آنی رکھینگ ءِ تہ ءَ پاکستان ءِ مھکمیں کمک ءَ را برجاہ دار ایں آئی ءَ گیش گوشت کہ چین پاکستان ءِ گوما انسداد ناشرکاری ءُ ایمنی ءِ کمک ءَ را مھکم کنگ ءُ دمگ ءَ را امن ءُ ایمنی ءُ مھکم دارگ ءِ واستہ تیار اِنت۔
