راولپنڈی۔ 12 مارچ (اے پی پی)اینٹی نارکوٹکس فورس تعلیمی ادارہ و ملک انا چندی شارتیٹی منشیات اسمگلنگ نا برخلاف کریک ڈاؤن اٹی 8 کارروائی تیٹی 45 لکھ آن زیات مالیت نا 61.488 کلوگرام منشیات دوئی کرے۔ ترجمان اے این ایف نا رداٹ منشیات نا بہا و اسمگلنگ اٹی اوار 9 دوبہ دار آتے ہم دزگیرکننگا۔ اوپارے کہ جی ٹی روڈ راولپنڈی ٹی بس اڈہ نا خڑک دوبہ دار آن 500 گرام چرس دوئی کننگا۔ دزگیر دوبہ دار تعلیمی ادارہ غاتا طالب علم آتے منشیات بہاکننگ نا اعتراف کرینے۔ ایلوکارروائی تیٹی اسلام آباد انٹرنیشنل بالی پٹ آ سعودیہ غا ہنوک آ مسافر نا ٹرالی بیگ اٹی اودیم کروک 2.382 کلوآئس دوئی کننگا، اسلام آباد انٹرنیشنل بالی پٹ آ دبئی آ ہنوک آ مسافر نا بوٹ آتیان 312گرام چرس، لاہور بالی پٹ آ جدہ غا ہنوک آ زالبول آتون اوار مسافر نا پڈآن 100 دانہ ہیرون آن پُرکیپسول و کراچی ٹی کوریئر آفس نا کمک اٹ مالدیپ آ مون تروک آ پارسل آن 94 گرام ہیرون دوئی کننگا۔ ہنداوڑ گجرات اٹی ریلوائی پھاٹک نا خڑک کار و موٹرسائیکل اسے آن جم وڑاٹ 36 کلوچرس دوئی کرسا 3 دوبہ دار آتے دزگیرکرے، جی ٹی روڈ پشاور آ بس اسٹاپ نا خڑک لاوارث موٹرسائیکل اسے ٹی اودیم کروک 15.6 کلوچرس وخت اس کہ اقبال شہید ٹول پلازہ اٹک نا خڑک اِرا زالبول آتا کوزہ غان 6 کلوچرس دوئی کننگا۔ دزگیر دوبہ دار آتا برخلاف انسداد منشیات ایکٹ انا رداٹ مقدمہ نوشتہ کرسا جاست وپاست نا بناءِ کننگانے۔
