اسلام آباد۔ 11 مارچ (اے پی پی) وزیراعظم محمد شہباز شریف طالب علم آتے گچین و پوسکن آ تعلیمی آسراتی تا فراوانی کن دانش اسکول آتیان پد دانش یونیورسٹی نا جوڑ کننگ نا پڑو کرسا پارینے کہ دانش یونیورسٹی ءِ ہندن ءُ ادارہ اس جوڑ کینہ ہرا دنیا ٹی پن اس ودی کیک، بدترین بددیانتی اٹ 190 ملین پاؤنڈ ءِ سرکاری خزانہ ٹی جمع کرفنگ نا جاگہ غا ہندن ءُ اکاؤنٹ اسے ٹی جمع کرفنگاسس ہرانا ملکی خزانہ تون ہچ ءُ تعلق اس الوکہ، دا زرءِ دانش یونیورسٹی آ خڑچ کننگک، دانش یونیورسٹی آن ہُشار طالب علم آتے گچین تعلیمی وارخواہی دُوبریک۔ اوداخیال آتا درشانی ءِ سے شنبے نادے آداڑے دانش یونیورسٹی نا سٹیئرنگ کمیٹی نا دیوان آن تران کرساکرے۔ وزیراعظم پارے کہ دانش اسکول آتیان پد دانش یونیورسٹی جوڑ کننگک و اپلائیڈ سائنسز نا ادارہ جوڑ کننگک ہرانا پن دانش یونیورسٹی مریک، نن خوانہ کہ اسہ ہندن ءُ یونیورسٹی اس جوڑ کین ہرا دنیا ٹی تینا پن ءِ ودی کے و نن طالب علم آتے علم انا دوئی کننگ کن گچین ادارہ ملنگ کے، دا یونیورسٹی ٹی آئی ٹی ، مصنوعی ذہانت، پٹ وپول و شونداری نا سینٹرز جوڑ مریک و باقاعدہ ورکشاپ اڈتننگک، اندرون ملک و مچ آ دنیا غان گچین اسکالرز و چاہندار آتے یونیورسٹی ٹی تعلیمی خذمت آتا فراوانی کن بٹنگنہ۔ اوپارے کہ داادارہ ورناچین نا آخبت ءِ جوڑ کننگ کن مزل نا نشان مریک، دانش یونیورسٹی آن ہُشار طالب علم آتے گچین تعلیمی وارخواہی دُوبریک و تینا خواری، قابلیت و ذہانت نا زی آ او مون آ ہِننگ کیرہ، پاکستان اٹی داوڑنا ادارہ مہالو آن ساڑی اف۔ وزیراعظم پارے کہ دا ملک انا تاریخ نا اسہ اہم ءُ دے اسے، بدترین بددیانتی اٹ 190 ملین پاؤنڈ ءِ سرکاری خزانہ ٹی جمع کرفنگ نا جاگہ غا ہندن ءُ اکاؤنٹ اسے ٹی جمع کرفنگاسس ہرانا ملکی خزانہ تون ہچ ءُ تعلق اس الوکہ، سپریم کورٹ نا چیف جسٹس نا منت واری ءِ ہرفیوہ کہ اوپارے کہ دازر حکومت پاکستان و پاکستان نا الس نا ءُ، و حکومت دا زر ءِ السی خیرخواہی کن ہراوڑخوائے خڑچ کننگ کیک، دازر ءِ دانش یونیورسٹی آ خڑچ کننگک، داباندات اٹی کمک کروک آ غٹ وزیر و ایلو تعلقدار محکمہ و آفیسر آتا منت واری ءِ ہرفنہ ، ڈٹ انا وخت آ پوروی کن پور و چکار کروئی مریک۔
