اسلام آباد۔ 10 مارچ (اے پی پی) وزیراعظم محمد شہباز شریف روچہ پیکج 2025نا مانیٹرنگ نا نظام نا ستاءِ کرسا پارینے کہ داپروگرام نا کمک اٹ 40 لکھ حقدار خاہوت آتیٹی 20 ارب روپئی بشخنگک، ڈیجیٹل والٹ انا کمک اٹ حقدار خاہوت آتیٹی شفافیت اتون زر انا بشخنگ ءِ پک کننگ انگ ءِ۔ وزیراعظم دوشنبے نادے آ روچہ پیکج 2025 نا مانیٹرنگ نا نظام نا جاچ ءِ ہلنگ کن نیشنل ٹیلی کمیونیکیشن کارپوریشن ہیڈکوارٹرزنا دورہ ءِ کرے۔ داڑے داہیت ذکر انا قابل ءِ کہ روچہ ریلیف پیکج نا رداٹ حقدار خاہوت آتیٹی زر انا بشخنگ کن اولیکو وار یکتا وڑنا ڈیجیٹل والٹ پروگرام ءِ کاریم اٹ اتنگ انگ ءِ و داگام آن شفافیت ءِ پک کننگانے و مستین اٹ نغڑدو بے آب اٹ گڑاتا فراوانی نا غاوتا ہم ازالہ ءِ کننگانے۔ داپروگرام نا کمک اٹ ہر چار آصوبہ، آزاد کشمیر و گلگت بلتستان اٹی 40 لکھ خاہوت آتیٹی فی خاہوت 5 ہزار روپئی نا حساب اٹ 20 ارب روپئی بشخنگک۔ حوال اٹی وزیراعظم ءِ پاننگانے کہ مانیٹرنگ سینٹر اٹی ملوک آ کال آتا پورو ڈیٹاساڑی ءِ و ہڑدے ئی ہزار آتا کچ اٹی الس معلومداری تا دوئی کننگ کن سینٹراٹی کال کننگ ءُ۔ غٹ کال آتے المی کارروائی آن پد سرتننگک۔ وزیراعظم ءِ پاننگاکہ 14 ارب روپئی نا زر حقدار الس آ گدریفنگانے و اسہ اسہ حقدار نا پورو ڈیٹاساڑی ءِ ، البتہ زر وصول کروک آ حقدار آتا کچ داسکان کم ءِ۔ وزیراعظم ڈیجیٹل والٹ پروگرام نا ستاءِ کرسا پروگرام نا سرسہب بناغا وزارت آئی ٹی و تعلقدار وزارت و کمامدارآتے مبارکبادی تس۔ وزیراعظم پارے کہ اولیکو وار 20 ارب روپئی نا روچہ پیکج بذریعہ ڈیجیٹل والٹ حقدار آتے تننگ انگ ءِ ، 40 لکھ حقدار خاہوت آتیٹی شفافیت اتون زر انا بشخنگ ءِ پک کننگ انگ ءِ۔ اوپارے کہ داکان مست یوٹیلیٹی اسٹورآتا کمک اٹ المی آ گڑاتا بشخنگ نا عمل اٹی کرپشن و ہیبدار و بے آب اٹ گڑاتا فراوانی نا غاو ئس۔ ساڑی آ پروگرام نا کمک اٹ کرپشن و ایلو غاوک چٹانو۔ اوپارے کہ الس نا راجی آسودہی ننا اولیت ءِ۔ داجوان و شاندار پروگرام سفت نا قابل ءِ۔ وزیراعظم پارے کہ روچہ مبارک اٹی حقدار آتا کمک ءِ کننگ بھاز نیک ءُ کاریم اسے۔ ڈیجیٹل والٹ نا پروگرام اسہ پوسکن ءُ کانسپیٹ اسے۔ دانا کمک اٹ حقدار آتے اُراٹی تولوک امداد ملک۔ نئے اوفتے لین تیٹی لگوئی تمک و نئے المی آ گڑاتا آب انا بابت غاو ودی مریک۔ ہرخاہوت تینا منشانا رداٹ دازر ءِ کاریم اٹ اتنگ کیک۔ وزیراعظم دانیک کاریم اٹی کمک کروک آ بینک، کمپنی و کمامدارآتا منت واری ءِ ہرفے۔ وزیراعظم پارت کرے کہ حقدار آتے مون تروک آ زر انا کشفنگ نا کچ بھاز کم ءِ، دابابت الس اٹ آگاہی فراوان کننگے۔ گورنر اسٹیٹ بینک و تعلقدار کمامدارآک اواری اٹ ڈیجیٹل والٹ انا وڑوڈول آتا بارواٹی الس ءِ معلومدار کیر۔ وزیراعظم 9999آ کال کرسا پروگرام نا بارواٹی معلومداری دوئی کرے۔ او9999آ موصول مروک آ غاوتا بارواٹی اَرفے۔ وزیراعظم پارے کہ بیدس اڑاند و تاخیر نا حقدار آتیٹی زر آتا بشخنگ ممکن مننگ ءِ۔ پوسکن آ نظام آن وڈی خوری نا پورو خاتمہ مس۔ داشاندار و جوان پروگرام سفت نا قابل ءِ۔ وزیراعظم آئی ٹی ، انڈسٹریز، اسٹیٹ بینک تون اوار تعلقدار کمامدارآتے پروگرام نا بابت المی پارت تس و پارے کہ اوفتیا دمدستی عملدرآمد کرسا رپورٹ پیش کننگک۔ دورہ ٹی بنجائی وزیر حوالکاری و شینکاری عطاء اللہ تارڑ، بنجائی وزیر انفارمیشن ٹیکنالوجی شزہ فاطمہ، خصوصی کمکار صنعت و پیدوار ہارون اختر و تعلقدار کمامدارآک ساڑی ئسر۔
