اسلام آباد۔ 10 مارچ (اے پی پی) بنجائی وزیر امور کشمیر و پاکستان مسلم لیگ (ن) خیبرپختونخوا نا صدر انجینئر امیر مقام پارینے کہ خیبرپختونخوانا حکومت نا کارکڑد نا کتابچہ ءِ تینٹ پی ٹی آئی ٹکر کرسا پڑزہ پڑزہ کرینے، یانزدہ سال آن زیات وخت آن مسلط پی ٹی آئی حکومت خیبرپختونخواءِ آثارقدیمہ جوڑ کرینے۔ دوشنبے نادے آ تینا اسہ بیان اسے ٹی بنجائی وزیرپارے کہ پی ٹی آئی نا تینا بدترین کارکڑد نا اعتراف آن پد خیبرپختونخوا ءِ حقی السی حکومت ملے۔ اوپارے کہ پی ٹی آئی کارندہ غاک بدترین کارکڑد نا آدینک ءِ اڈیالہ زندان اٹی بند تینا لیڈر ءِ نشان تسنو، بنجا، پنجاب و خیبرپختونخوا ہرجاگہ غا پی ٹی آئی بھسکاری، بربادی و کرپشن ناریکارڈ جوڑ کرے۔ اوپارے کہ یانزدہ سال آن زیات وخت آن مسلط پی ٹی آئی حکومت خیبرپختونخوا ءِ آثارقدیمہ جوڑ کرینے۔
