اسلام آباد۔ 10 مارچ (اے پی پی) بنجائی وزیر جا ن جوڑی سید مصطفیٰ کمال پارینے کہ وزارت جا ن جوڑی تون کروڑآ شاری تا زند وابستہ ءِ، ننا فیصلہ غاتا اثر بلواسطہ و بلاواسطہ الس آ تمک۔ داخیال آتا درشانی ءِ او وزارت نا قلمدان ءِ سنبھالنگ آن پد دیوان نا کماشی ٹی کرے۔ وزارت جان جوڑی آن جاری بیان نا رداٹ وزارت آبننگ آ بنجائی سیکرٹری ہیلتھ ندیم محبوب و وزارت نا سینئر کمامدارآک بنجائی وزیر جان جوڑی ءِ بخیرکریر۔ بنجائی وزیر جا ن جوڑی ءِ جان جوڑی نا امور نا بارواٹی سرجمی اٹ حوال تننگا۔ دیوان اٹی فیڈرل سیکرٹری ہیلتھ ندیم محبوب، اسپیشل سیکرٹری ہیلتھ، ایڈیشنل سیکرٹری ہیلتھ، ڈی جی ہیلتھ و ایلو سینئر آفیسر آک ساڑی ئسر۔ دیوان اٹی پی ایم ڈی سی ، ڈریپ، پاکستان نرسنگ کونسل، پولیو و ہسپتال آتا ورکنگ نا بارواٹی حوال تننگا۔ حوال آن پد بنجائی وزیر جان جوڑی سید مصطفیٰ کمال وزارت جان جوڑی نا آفیسر و کارندہ غاتون گپ وتران کرسا پارے کہ اللہ پاک ءِ تینا مخلوق تون بھاز مہرومریبت ءِ۔ خدانا مخلوق نا کاریم اٹ بننگ غٹ آن بھلا عبادت ءِ۔ اوپارے کہ جا ن جوڑی نا وزارت ہندن ءُ ادارہ اسے، ہراڑتون کروڑآ الس نا زند وابستہ ءِ۔ ننا کروک آ فیصلہ غاتا اثربلواسطہ و بلاواسطہ الس آ تمک ۔ اوپارے کہ داہیت ءِ پک کینہ کہ ننا فیصلہ و گام گیج آتیان الس نا زند آ جوان اثررونما مرے۔
