اسلام آباد۔8مارچ (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ گشتگ کہ مرچی غزہ وتی تہاریں دور ءَ چہ گوزگ ءَ انت کہ آہانی تہا زہگ ءُ زالبولاں ہوار 48 ہزار بے گناہیں فلسطینی شہید بوتگ انت ءُ غزہ ءِ بنیاتی ڈھانچہ تباہ بوتگ انت۔ اے ھیالانی درشانی آئی ءَ او آئی سی ءِ دری کارانی کونسل ءِ ھاسیں دیوان ءَ گوں تران کنان ءَ کت۔ اے موہ ءِ سر ءَ درئی کارانی وزیر سینیٹر محمد اسحاق ڈار ءَ میاں اوستمانی براتی ءَ را مبارکیں رمضان ءِ ماہ ءِ مبارک بات دات ءُ دعا کت کہ پاکیں رمضان ءِ ماہ دگنیا ءَ امن ءُ ایمنی ءُ وشھالی بہ دنت۔ آئی ءَ دیوان ءِ میزبانی ءِ واستہ دو شریک مسجد ءِ نگہبان ءُ سعودی ولی عہد ءِ ھم منت واری ءِ درشان کت ءُ گوشت کہ او آئی سی ءِ سیکرٹری جنرل ءَ ھاسیں دیوان ءِ واستہ ترندیں گامگیج آناں دل یکیمی کتگ۔ آئی ءَ گْوشتگ کہ غزہ ءِ تہ ءَ وانگجاہ، نادراھجاہ، لوگ، عبادت جاہ ءُ تجارتی ءُ کاروباری مراگش ملبہ ءِ ڈھیر جوڑ بوتگ اَنت۔ محمد اسحاق ڈار ءَ مصر ءُ امریکہ ءِ نیمگ ءَ جنگ بندی ءِ کوشست آناں اُمیت ءِ وسیلگ لیکگ ءَ گوشت کہ فلسطین ءِ استیں جاور ھال چہ مسلم امت ءَ ترندیں پسو ءِ لوٹ ءَ کن اَنت۔ نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان جنگ بندی ءِ گامگیج ءَ را ارزشت دنت ءُ بے یقینی ءِ ھلاسی ایوک ءَ دائمی امن ءِ وسیلگ ءَ ممکن اِنت۔ آئی ءَ گوشت کہ یک رندے پد ءَ غزہ ءَ انسانی کمک بند کنگ بوتگ۔ آئی ءَ گوشت کہ پاکیں ماہ رمضان ءِ ساھت ءَ اے رنگیں زلم ءُ زوراکی سک مذمت کنگ بنت۔ آئی ءَ گوشت کہ انسانی کمک ءِ سر کنگ ءِ راہ ءَ بند کنگ جنگی جرم زانگ بیت، ءُ غزہ ءِ الس آنی زندگ بوھگ ایوک ءَ کمک ءِ سر کنگ ءِ وسیلگ ءَ ممکن اِنت۔ آئی ءَ گوشت کہ جنگ بندی ءِ سرجمیں عملدرآمد کمک ءِ سر کنگ ءِ واستہ المی انت ۔ نائب مزن وزیر ءُ وزیر ءِ درئی کار ءَ گوشت کہ اسرائیل ءِ فلسطین ءَ جنگ ءُ زلم ءِ دوبر بندات کنگ ءِ واھشت ءَ را یکجائی ءَ چہ گر ءُ دار کنگ بہ بیت۔ آئی ءَ گوشت کہ مغربی کنارہ ئِ تہ ءَ اسرائیل ئِ کارروائی ئِ وھد ءَ تاں وھد ءَ ایمنی ممکن نہ اِنت۔ محمد اسحاق ڈار ءَ مقبوضہ فلسطین ءِ تہا زلم ءُ زوراکی ءُ ناانصافی ءِ زوتیں ھلاسی ءِ سرا زور دیان ءَ گشتگ کہ مسلم امت ءَ اے گپ پدر کنگی انت کہ فلسطینیانی چہ غزہ یا مغربی کنارہ ءَ بے لوگ کنگ نسل کشی انت ءُ فلسطینی راج ءَ چہ وتی وطناں درکنگ نسل کشی ءِ برابر انت۔ آئی ءَ لوٹ کتگ کہ فلسطینیانی آوار جنگ ءِ بابت ءَ اسلامی کمک ءِ گل ءِ نیمگ ءَ ھرچ پیشکش رد کنگ بہ بیت ءُ اے وڑیں ھرچ ایجنڈا ءِ ھلاپ ءَ یکجاہ بہ بیت۔ آئی ءَ گوشت کہ سعودی عرب ءَ فلسطینی ریاست ءِ جوڑ کنگ ءِ ھوالگ ءَ اسرائیل ءِ مزن وزیر ءِ تجویز اشتعال انگیز ءُ سک مذمت ءِ لائک انت۔ نائب مزن وزیر ءُ دری کارانی وزیر سینیٹر محمد اسحاق ڈار ءَ گوشت کہ پاکستان اے رد ءَ سعودی عرب ءِ گوما سرجمی ءَ یکوئی ءِ درشان ءَ کنت۔ آئی ءَ گوشت کہ اے مسلمان امت ءِ واستہ فیصلہ کنوکیں ساھت اِنت فلسطین ءِ اُلس ھمدردی ءِ بیان نہ لوٹ اَنت، بلکیں مھکمیں کارروائی لوٹ اَنت۔ آئی ءَ گوشت کہ ما وتی گپ ءُ تران ءَ چہ نہ بلکیں وتی عمل ءَ چہ دیم دیاں۔ محمد اسحاق ڈار ءَ گند ءُ نند ءِ ساھت ءَ پاکستان ءِ نیمگ ءَ جتاجتائیں تجویز پیش کنان ءَ گوشت کہ جنگ بندی ءِ سئے نقطہ ءِ منوگر ءِ سر ءَ عمل کنگ بہ بیت ءُ جنگ ءِ دائمی ھلاسی ءَ را دل یکیمی کنگ بہ بیت۔ آئی ءَ اے گپ ءِ سرا زور دات کہ فلسطین ءَ انسانی کمک ءِ سر کنگ ءُ یک سرجمیں نوک جوڑیشت ءِ منصوبہ ءِ زوت دل یکیمی کنگ بہ بیت ءُ اسرائیل ءِ فورسز ءِ سرجمیں غزہ ءَ درکپگ ممکن کنگ بہ بیت۔ آئی ءَ پاکستان ءِ نیمگ ءَ اے تجویز داتگ کہ مغربی کنارہ ءَ اسرائیل ءِ زوراکی زوت ھلاس کنگ بہ بیت ءُ فلسطینی آناں زوت ءُ بے ھچ رکاوٹ ءَ انسانی کمک دیگ بہ بیت۔ آئی ءَ گوشت کہ فلسطینی آں پہ زور آوار جنگ ءِ کار ءَ را سہریں لکیر ءِ جنگ بہ بیت۔
