کوئٹہ۔ 08 مارچ (اے پی پی): بلوچستان ءِ گورنر جعفر خان مندوخیل ءَ زالبولانی میاں اوستمانی روچ ءِ درگت ءَ وتی کلوہ ءِ تہ ءَ گوشت کہ زالبول آنی اقتصادی آجوئی وتی توانائی آناں گیش کنگ ءُ دگہ درستیں ھک ءُ گچین آنی رسگ ءِ یک ھاسیں وسیلگ اِنت۔ ہچ راج راستی ءَ دیمروئی نہ کنت داں کہ زالبول دیمروئی ءُ دیمروئی ءِ رسگ ءَ مردینانی ہمراہی ءَ مہ اوشت انت۔ مرچیگیں نوکیں دنیا ءَ اے گپ باز منّگ بیت کہ چاگردی ءُ اقتصادی دیمروئی ءِ تہا زالبول ءُ مردین یک پیمیں کردے داریت۔ راجی وشھالی ءُ دیمروئی ءِ واب ھما وھد ءَ سرجم کنگ بیت کہ زالبولانی سیاسی، معاشی، ءُ چاگردی کارانی تہ ءَ سرجمیں بھر زوری ءُ ھوار کنگ ءَ دل یکیمی کنگ بہ بیت۔ اے دل ءَ وش کنت کہ مئے چاگرد ءَ زالبولانی سک باز احترام کنگ بیت ءُ آہانی سرا ھمکچ وڑیں زوراکی مئے راجی قدر ءُ قیمتانی خلاف ورزی زانگ بیت بلے آہانی بے دروریں توانائی ءِ باوجود زالبولاں باز براں گریبی ءُ موہ ءِ کمی ءِ وڑیں رکاوٹانی دیمپانی کنگی انت۔ دلبڈی ءِ گپ ایش انت کہ بلوچستان ءِ میتگ ءُ دمگاں وانندہیں زالبولانی تناسب ءَ مزنیں گہتری یے اتکگ ءُ سرجمیں صوبہ ءَ یونیورسٹی آنی تہا زالبولانی داخلہ ءِ تہا مزنیں گیشی یے بوتگ۔ اے رپک ءِ برجاہ دارگ ءِ ھاترا زالبولانی اقتصادی توانائی، چاگردی ایمنی ءُ شرپ ءِ دیمروئی ءِ ھاترا یک مھکمیں راج سرپدی ءِ مہم ءِ ضلورت اِنت۔ اے مئے اجتماعی راجی فرض انت کہ ما زالبولاں چاگردی ایمنی ءِ پجارینگ ءُ حقیقی چاگردی دیمروئی ءِ راہ ءَ پچ بہ کنیں۔
