اسلام آباد- 7 مارچ (اے پی پی): مزن وزیر محمد شہباز شریف ءَ چین ءُ پاکستان ءِ اقتصادی راہداری ءِ چیر دستی ءَ جتا جتائیں گامگیج ءُ منصوبگ آنی وھد ءُ پاس ءِ سر ءَ عمل کنگ ءُ سرجمی ءَ را دل یکیمی کنگ ءِ واستہ دوئیں ملک آنی یکجائی ءَ کار کنگ ءِ سر ءَ زور پر دات ءُ گوشت کہ دوئیں ملک آنی سروکی ءُ الس نوکیں رنگ ءَ سیادی آناں زورگ ءِ ھاترا جزم انت۔ آئی ءَ اے ھیالانی درشانی پاکستان ءَ چینی سفیر جیانگ زیڈونگ ءَ گوں گپ ءُ تران کنان ءَ کت اَنت آئی ءَ جمعہ ءِ روچ ءَ مزن وزیر گس ءَ آئی ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ مزن وزیر ءَ چین ءِ صدر شی جن پنگ ءُ مزن وزیر لی کی کیانگ ءِ واستہ نیکیں واھگ آنی درشان کتگ۔ آئی ءَ چینی سروکی ءُ راج ءَ را راجی کانگریس ءُ چینی راجی سیاسی مشاورتی کانفرنس ءِ ’’دو دیوان‘‘ ءِ سوبمندیں برجم دارگ ءِ سر ءَ ھم مبارک بات دات۔ کلیں بنیاتی جیڑہ آئی ءَ چین ءِ راجی مفاد ءِ جیڈھ آنی واستہ پاکستان ءِ یکجاھیں ءُ بے مٹیں کمک ءِ ھم پدر کت ءُُ گوشت کہ دوئیں ملک آنی سروکی ءُُ الس پاکستان ءُ چین ءِ ’’تمام موسمی اسٹریٹجک کوآپریٹو پارٹنر شپ‘‘ ءَ را گیش مھکم کنگ ءُُ ایشی ءَ را نوکیں بالاد ءَ سر کنگ ءِ واستہ جزم انت۔ مزن وزیر ءَ اے گپ ءِ سر ءَ وشی ءِ درشان کت کہ اے سال ءَ 2015 ءَ صدر شی جن پنگ ءِ پاکستان ءِ راجدپتری تر ءُُ تاب ءِ دہ سال سرجم بیت۔ اے درگت ءَ مزن وزیر ءَ اے یاتگاریں موہ ءَ شرپ مندیں رنگ ءَ دارگ ءِ ہدایت جاڑی کت۔ آئی ءَ صدر شی جن پنگ ءَ را پاکستان ءِ سرکاری تر ءُُ تاب ءِ واستہ وتی مخلصانہ دعوت ءِ ھم نوک کت۔ گند ءُ نند ءِ ساھت ءَ مزن وزیر ءَ چین پاکستان ءِ اقتصادی راہداری ءِ چیر دستی ءَ جتا جتائیں گامگیج ءُ منصوبگ آنی وھد ءُ پاس ءِ سر ءَ سرجمی ءِ واستہ دوئیں نیمگ آنی یکجائی ءَ کار کنگ ءِ ارزشت ءِ سر ءَ زور پر دات چینی سفیر ءَ مزن وزیر ءِ چین ءِ سروکی ءِ واستہ نیکیں واھشت آنی سر ءَ منت گپت۔ آئی ءَ مزن وزیر ءَ را پاک چین ءِ دو نیمگی کمک ءِ تہ ءَ نوکیں دیمروئی آنی بابت ءَ سرپد کت۔ ملک ءِ میکرو اکنامک جاور ھال ءَ را گہتر کنگ ءِ واستہ حکومت ءِ کامیابی آناں ساڑاتگ ءَ چینی سفیر ءَ یک رندے پدا گوشت کہ چین پاکستان ءِ راجی دیمروئی ءِ کوشست آنی تہ ءَ وتی سرجمیں کمک ءُُ کمک ءَ برجاہ دار ایت۔
