اسلام آباد۔ 07 مارچ (اے پی پی) ایشیائی شونداری بینک (اے ڈی بی ) نا 58می سالانہ دیوان 4آن 7مئی 2025اسکان اٹلی نا شار میلان اٹی اڈ ہلیک۔ اٹلی اولیکو وار ایشیائی شونداری بینک انا دیوان نا مہمانداری ءِ کننگ ءِ وخت اس کہ یورپ اٹی کم و ود اسہ دہائی آن پد ایشیائی شونداری بینک انا سالانہ دیوان مریک۔ دیوان نا سرحال ’’آزموندہ غاتا شریداری سیکل نا تفنگ‘‘ تخنگانے۔ دیوان اٹی باسک ملک آتا عہدیدار ایشیاو بحر الکاہل نا ڈیہہ اٹی شونداری ویل و چیلنج آتیا سجفرہ۔ دیوان اٹی عمومی وڑاٹ وزراء خزانہ، مرکزی بینک آتا گورنرز، بڑزکو حکومتی کارندہ، نجی بشخ و جہانی تنظیم آتا نمائندہ، سول سوسائٹی و میڈیا نا نمائندگان آن بیدس ہزار آ بندغ آک شریک مریرہ۔ بینک انا صدر اسہ بیان اسے ٹی پارے کہ ڈیہہ انا ملک آک موسمیاتی و شونداری چیلنج آتون چرجوئی اٹ مون تننگ ءُ، و اوفتا ایسری اس پٹنگ کن ننا پدریسہ گام گیج آتا گرج ءِ۔ اوپارے کہ میلان، جدت و صنعتی رداٹ اہم اہمیت تخوک شار اسے ہرا شونداری و کمکاری نا جوزہ نا نمائندگی کیک، و دا آزموندہ غاتا شریداری و گچین آخبت نا جوڑ کننگ کن اسہ بے مٹ ءُ ہند اسے۔
