اسلام آباد۔ 07 مارچ (اے پی پی) وزیراعظم روچہ پیکج نا شفاف نفاذ و گچین مانیٹرنگ کن نیشنل ٹیلی کمیونیکیشن کارپوریشن (این ٹی سی) ٹی خصوصی کنٹرول روم اس جوڑ کننگا۔ وزارت انفارمیشن ٹیکنالوجی و ٹیلی کمیونیکیشن نا کنڈآن جاری بیان نا رداٹ وزیر آئی ٹی و ٹیلی کام شزا فاطمہ خواجہ این ٹی سی نا کنٹرول روم نا دورہ ءِ کرے و روچہ پیکج نامانیٹرنگ نا نظام نا جاچ ءِ ہلک۔ وزیر آئی ٹی و ٹیلی کام ءِ کنٹرول روم اٹ روچہ پیکج نا ڈیجیٹل مانیٹرنگ کن تیار کروک پورٹل نا کاریم کننگ نا وڑوڈول آ حوال تننگا۔ شزا فاطمہ خواجہ ءِ دیوان اٹی روچہ پیکج نا رداٹ تروک آ سبسڈی ، مانیٹرنگ میکانزم و السی غاوتا ازالہ نا بابت حوال تننگا۔ اودے روچہ پیکج نا رداٹ جوڑ کروک کال سینٹر نا کارکڑد سکرین آ مانیٹرنگ نا کمک اٹ نشان تننگا، السی غاو تا چٹفنگ کن کروک آ کوشست آتیا ہم حوال تننگا۔ وزیر شزافاطمہ خواجہ پارت کرے کہ روچہ پیکج نا مانیٹرنگ کن تیار کروک پورٹل ءِ پین گچین وصارف دوست کننگے تانکہ الس ءِ زیات آن زیات آسراتی فراوان کننگ مرے۔
