لائخ آ ورناتا کابینہ ٹی اوار مننگ آن حکومت نا کاریم نا کچ اٹی ودکی مریک، وزیراعظم شہباز شریف

اسلام آباد۔ 06 مارچ (اے پی پی) وزیراعظم محمد شہباز شریف پارینے کہ ورناک داملک انا سرمایہ ءُ، لائخ آ ورناتا کابینہ ٹی اوار مننگ آن حکومت نا کاریم نا کچ اٹی ودکی مریک۔ وزیراعظم آفس نا میڈیا ونگ آن جاری بیان نا رداٹ وزیراعظم داخیال آتا درشانی ءِ خصوصی کمکار حذیفہ رحمان تون گپ وتران کرساکرے ہرا پنچ شنبے نادے آ داڑے اوڑتون اوڑدہی کرے۔ وزیراعظم حذیفہ رحمان ءِ بنجائی کابینہ ٹی اوارمننگ آ مبارکبادی و نیک است خواہی نا درشانی ءِ کرے۔ وزیراعظم پارےکہ ورناک دا ملک انا سرمایہ ءُ و لائخ آ ورناتا کابینہ ٹی اوار مننگ آن حکومت نا کاریم نا کچ اٹی ودکی مریک ۔ داوخت آ حذیفہ رحمان ساڑی آ زرگزرانی سوگوی آ وزیراعظم ءِ خراج تحسین پیش کرے و السی راجی آسودہی کن سرگرم عمل مننگ نا عزم انا درشانی ءِ کرے۔ حذیفہ خان وزیراعظم نا پت آ پورو سلنگ نا عزم انا درشانی ءِ کرے۔