وزیراعظم نا کماشی ٹی دیوان، ورناتیکن مارکیٹ و صنعت آتیٹی کسب و کھپت نا رداٹ ہیلکاری پروگرام تا ڈٹ انا منظوری

اسلام آباد۔ 06 مارچ (اے پی پی) وزیراعظم محمد شہباز شریف ورناتیکن مارکیٹ وصنعت آتیٹی کسب و کھپت نا رداٹ ہیلکاری پروگرام تا ڈٹ انا منظوری ءِ تس ، وزیراعظم ڈٹ آ عملدرآمدنا تینٹ چاروکی ءِ کیک۔ پنچ شنبے نادے آ وزیراعظم آفس نامیڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی نیشنل یوتھ ایمپلائمنٹ پلان نا بابت جاچ دیوان اس مس۔ دیوان اٹی بنجائی وزیر احدخان چیمہ، شزہ فاطمہ خواجہ، چیئرمین وزیراعظم یوتھ پروگرام رانا مشہود احمد خان، چیئرمین ہائرایجوکیشن کمیشن ڈاکٹر مختار احمد و تعلقدار بڑزکو کمامدارآک بشخ ہلکر۔ وزیراعظم ورناتے چندی بشخ آتیٹی تربیت کن ہندی صنعت آتون پدریسہ رابطہ و افرادی قوت نا جہانی ادارہ غاتا کھپت ءِ مون آ تخنگ نا پارت کرے و تُوئی جاچ دیوان نا تینٹ کماشی ءِ کننگ نا فیصلہ کرینے۔ وزیراعظم ہندی صنعت آتیٹی درکار کسب نا بابت اسہ جوان ءُ ڈیٹا بیس اس جوڑ کننگ نا ہم پارت کرے۔ وزیراعظم پارے کہ پاکستان نا لائخ آ ورناک ملک انا غٹ آن نہادی میرات ءُ، ورناتے کسبی تربیت و المی کسب نا فراوانی اٹ واکدار و برسرروزگار کننگ اُن۔ پاکستانی ورناتے جہانی آب انا  تربیت نا فراوانی آن افرادی قوت نا برآمد نا مون آ دننگ کن گام گیج اُن۔ دیوان اٹی وزیراعظم ءِ بروک آ 4 سال اٹی چندی ادارہ غاتا کمک اٹ تربیت و روزگار نا وارخواہی فراوان کننگ نا لائحہ عمل آن معلومدار کننگا۔ دیوان ءِ پاننگاکہ بروک آ 4 سال اٹی 24 لکھ سالانہ غان ہلیس 60 لکھ سالانہ اسکان ورناتے کسبی تربیت و کسب نا فراوانی آن روزگار نا وارخواہی دوئی کننگ اٹ کمک کننگک۔ دیوان ءِ پاننگاکہ ورناتے کسب و کسبی تربیت نا فراوانی کن مارکیٹ و صنعت و جہانی کہول آ افرادی قوت  نا کھپت ءِ مون آتخنگ انگ ءِ۔ دیوان اٹی وزیراعظم ءِ پاننگاکہ ڈیجیٹل یوتھ حب گڈیکو ریسہ غاتیٹی ءِ ہرادے برجاتُواٹی جاری کننگک۔ وزیراعظم تعلقدار وزارت و ادارہ غاتا دابابت کوشست آتا ستاءِ کرے۔