اسلام آباد۔4مارچ (اے پی پی): کرغزستان ءِ سفیر آواز بیک اتاخانوف ءَ توان ءِ بنجاھی وزیر سردار عویس احمد خان لغاری ءَ گوں گند ءُ نند ءَ دو نیمگی سیادی ءَ را گیش مھکم کنگ ءُ ھاسیں رنگ ءَ توان ءِ شوبگ ءَ گیش کمک ءِ امکانات ءِ سر ءَ تران کت۔ سئے شمبے ءِ روچ ءَ پاور ڈویژن ءِ جارکش ءِ نیمگ ءَ جاڑی بوتگیں بیان ءِ رد ءَ اے موہ ءِ سر ءَ دوئیں نیمگ ءَ توانائی ءَ ھوار جتا جتائیں شوبگ آنی تہ ءَ وت مہ وتی کمک ءَ را گیش کنگ ءِ واستہ وتی جزم ءِ پدا پدر کتگ۔ بنجاھی وزیر ءَ پاکستان ءُ کرغزستان ءِ نیام ءَ مثالی براتانی سیادی ءِ ذکر کنان ءَ جتا جتائیں شوبگ آنی تہ ءَ گیش کمک ءَ را دیمروئی دیگ ءِ واھشت ءِ درشان کت۔ آئی ءَ گوشت کہ کرغزستان ءِ یونیورسٹی آنی تہ ءَ پاکستانی نودربر آنی مزنیں کساس ءَ مزنیں وانگ ءُ زانگ ءِ واستہ دیم ءَ روگ ءَ انت، اے یک جوانیں وانگ ءُ زانگ ءِ نظام ءِ ثبوت انت۔ بنجاھی وزیر ءَ کرغزستان ءِ سفیر ءَ را توان ءِ شوبگ ءَ کارکرد ءُ برجائی ءَ را گہتر کنگ ءِ واستہ پاکستان ءِ حکومت ءِ نیمگ ءَ کتگیں اصلاحات آنی بابت ءَ سرپد کت ءُ کرغزستان ءِ سرمایہ کار آناں پاکستان ءِ توان ءِ شوبگ ءَ سرمایہ کاری ءِ موہ آناں پٹ ءُ پول کنگ ءُ جتا جتائیں منصوبگ آنی تہ ءَ بھر زوری کنگ ءِ دعوت دات۔ آئی ءَ قابل تجدید توانائی ءِ تہ ءَ یکجائی منصوبگ آنی ارزشت ءِ سر ءَ ھم زور پر دات۔ کرغزستان ءِ سفیر ءَ توان ءِ شوبگ ءِ اصلاحات ءِ واستہ پاکستان ءِ کوشست آناں ساڑات ءُ وت مہ وتی مفاد ءِ شوبگ آنی تہ ءَ کمک ءِ واستہ وتی ملک ءِ جزم ءِ درشان کت۔ آئی ءَ اے گپ ءِ سر ءَ زور پر دات کہ توان ءِ بنیاتی ڈھانچگ ءُ دمگی توان ءِ سیادی ءَ را مھکم کنگ ءَ چہ اقتصادی دیمروئی ءُ برجائی ءَ را دیم ءَ برگ بیت۔ گند ءُ نند ءَ دوئیں رہشوناں وت مہ وتی کمک ءَ را گیش گہتر کنگ ءِ واستہ وتی جزم ءِ پدا زور دات ءُ آیوکیں منصوبگ آنی سر ءَ گپ ءُ تران ءِ برجاہ دارگ ءِ سر ءَ تپاک کت کہ ایشی ءَ چہ پاکستان ءُ کرغزستان ءِ نیام ءَ اقتصادی ءُ اسٹریٹجک سیادی ءَ را گیش مھکم کنگ بیت۔
