اسلام آباد۔4مارچ (اے پی پی): مزن وزیر محمد شہباز شریف ءَ پاکستان ءُ آذربائیجان ءِ نیام ءَ تپاک نامہ ءُ معاہدہ آنی سر ءَ عمل کنگ ءِ ہدایت کتگ ءُ نائب مزن وزیر ءُ درئی کارانی وزیر اسحاق ڈار ءِ نگرانی ءَ پاکستان ءِ صدر ءِ اے زرجن ءِ تہ ءَ 2ارب ڈالر ءِ سرمایہ کاری ءِ جار ءِ ھوالگ ءَ کمیٹی جوڑ کتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آذربائیجان ءِ گوستگیں تر ءُ تاب ءِ ھوالگ ءَ مزن وزیر ءِ سروکی ءَ سئے شمبے ءِ روچ ءَ چار ءُ تپاسی دیوان برجم دارگ بوت۔ گند ءُ نند ءَ نائب مزن وزیر ءُ درئی کارانی وزیر اسحاق ڈار، بنجاھی وزیر احد خان چیما، جام کمال خان، عبدالعلیم خان، ڈاکٹر مصدق ملک، ھاسیں کمکار طارق فاطمی، ءُ سیادی داروکیں مزنیں کارندہ آنی بھر زوری بوتگ۔ گند ءُ نند ءَ مزن وزیر ءَ تر ءُ تاب ءِ ساھت ءَ دستخط کتگیں تپاک نامہ ءُ معاہدہ آں زوت چہ زوت عمل درآمد کنگ ءِ ہدایت کت۔ مزن وزیر ءَ وزارت تجارت ءَ را ہدایت کت کہ آ پاکستان ءُ آذربائیجان ءِ نیام ءَ استیں تجارت ءِ کساس ءَ را 2ارب ڈالر ءَ سر کنگ ءِ ھاتر ءَ یک کمیٹی یے جوڑ بہ کنت۔ توانائی ءُ انفراسٹرکچر ءِ شوبگ ءَ معاہدہ ءِ سرا کار کنگ بوتگ۔ مزن وزیر ءَ آیوکیں ماہ ءَ آذربائیجان ءِ صدر ءِ متوقع تر ءُ تاب ءَ چہ پیسر ترجیحی بنیاد ءَ سرجمیں تیاری آناں سرجم کنگ ءِ ہدایت کتگ مزن وزیر ءَ آذربائیجان ءَ ھوار درستیں ملک آنی تہ ءَ تجارتی افسر آنی تعینات کنگ ءِ ھم ہدایت کتگ کہ اودا پاکستان ءُ آذربائیجان ءِ گوما تجارت ءِ واستہ مزنیں گنجائش است انت۔ ما پاکستان ءُ میاں اوستمانی ملک آنی نیام ءَ بیپار ءُ سرمایہ کاری ءِ مزنیں گنجائش ءَ را سرجمی ءَ کارمرد کنگ ءِ واستہ اولویت ءِ بنیاد ءَ گامگیج کنگ ءَ ایں ۔ گند ءُ نند ءَ مزن وزیر ءَ را باکو ءَ برجم داشتگیں یکجائی بزنس فورم ءِ بابت ءَ سرپد کت ءُ سرپد کت کہ فورم ءِ تہ ءَ 83پاکستانی ءُ 101 آذربائیجان کمپنی آں بھر زرتگ۔ گند ءُ نند ءَ گوشت بوت کہ مزن وزیر ءِ تر ءُ تاب ءِ ساھت ءَ پاکستان ءُ آذربائیجان ءِ نیام ءَ دو نیمگی کمک ءَ را دیمروئی دیگ ءِ واستہ 13 تپاک نامہ ءُ معاہدہ آنی سر ءَ دستخط کنگ بوت۔
