اسلام آباد۔ 03 مارچ (اے پی پی) وزیراعظم محمد شہباز شریف جنگلی حیات نا رکھ انا عزم انا درشانی ءِ کرسا پارینے کہ حکومت حیاتیاتی تنوع نا اہمیت نا بابت شعور بیدار کننگ کن کوشست کننگ ءِ، ببو پاکستان نا زیبا جنگلی حیات نا گچینی کن اواری اٹ کاریم کیر۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ جنگلی حیات نا جہانی دے انا وخت آ تینا کلہو اٹی وزیراعظم پارے کہ جنگلی حیات نا جہانی دے انسانیت و فطرت نا نیام اٹ تعلق نا اسہ یات دہانی اسےنا وڑاٹ اڈتننگک، دادے ننے داہم یات ترفک کہ نن بھلا جنگلی حیات آتا رکھ اکن تینا زمواری آتیا سجفن ہرا ننا زند و ماحولیاتی نظام ءِ سوگوی اس ایترہ۔ اوپارے کہ ہمالیہ نا برفانی چیتہ غان ہلیس خطرہ غان دوچار دریائے سندھ نا ڈولفن و بحیرہ عرب نا شاندار وہیل شارک اسکان پاکستان ءِ مسحور کن حیاتیاتی تنوع تننگانے، دا انواع بیرہ ننا قدرتی میرات نا بشخ اس اف بلکن دا ساہدار ماحولیاتی توازن ءِ برقرارتخنگ و ننا چاگڑد و زرگزران ءِ برقرارتخنگ اٹ اہم کڑد ادا کیرہ۔ اوپارے کہ داسال جنگلی حیات نا جہانی دے انا سرحال’وائلڈ لائف کنزرویشن فنانس: مخلوق و تینا سیارہ ڈغار اٹی زرکاری ‘ جان جوڑ چاگڑدی نظام، پائیدار زرگزران و انسانی آسودہی ءِ برقرارتخنگ اٹ جنگلی حیات نا المی کڑد ءِ امنا کرسا جنگلی حیات نا چین تا رکھ اکن پوسکن آ مالیاتی وڑوڈول نا اہم گرج ءِ تالان کیک۔ اوپارے کہ تینا مخلوق و کرہ ارض ہڑتوم آتیکن پائیدار آخبت اٹ زرکاری کرسا ننا گرین پاکستان پروگرام ہندی کمیونٹی تے زرگزرانی وارخواہی فراوان کیک، ہرا غیرکانودی شکار و رہائش گاہ تا بھسکاری ءِ تورک ۔ اوپارے کہ خطرہ غاتا گواچی جنگلی ساہدار تا بابت جہانی واپار نا کنونشن آ دستخط کننگ آن جنگلی حیات نا غیرکانودی واپار نا برخلاف کانود سازی ءِ سوگوی ملک۔ داکان بیدس اسلام آباد وائلڈ لائف مینجمنٹ بورڈ، وزارت موسمیاتی بدلی و چاگڑدی رابطہ کاری نا رداٹ ٹھپی، چوری و جور و زیاتی نا گواچی ساہدارتا بحالی کن وائلڈ لائف ریسکیو سینٹراس جوڑ کننگانے ہرانا مسخت اوفتے جنگلی حیات اٹی دُوارہ اوار کننگ یا اوفتا مخصوص گرج آتے پورو کروک آ پناہ گاہ تیٹی جاگہ تننگ ءِ۔ اوپارے کہ ننا حکومت ہندی کمیونٹی، چاگڑد نا رکھ کروک و جہانی شریدار آتون اواری اٹ حیاتیاتی تنوع نا اہمیت نا بارواٹی بیداری ودی کننگ نا کوشست آتے سوگو کننگ ءِ۔ اوپارے کہ ببو پاکستان نا زیبا جنگلی حیات نا گچینی کن اواری اٹ کاریم کیر و جہانی برادری نا اسہ فرض شناس باسک اسے نا وڑاٹ تینا زمواری ءِ پورو کیر۔
