راولپنڈی۔ 03 مارچ (اے پی پی) اینٹی نارکوٹکس فورس (اے این ایف) تعلیمی ادارہ و ملک انا چندی شار تیٹی منشیات سمگلنگ نا برخلاف برجاکریک ڈاؤن اٹی 9 کارروائی تیٹی 6 دوبہ دار آتے دزگیرکرے۔ اے این ایف ہیڈکوارٹر راولپنڈی آن برجاتدوک آ 24 گھنٹہ نا انسداد منشیات کارروائی تا سرجم حوال آتا رداٹ تازہ کارروائی تیٹی 4 کروڑ روپئی آن زیات مالیت نا 595.47 کلوگرام منشیات دوئی کننگا۔ کراچی ٹی جناح روڈ صدر نا خڑک دوبہ دار آن 91 نشئی ءُ گولی دوئی کننگا۔ ترجمان پارے کہ دزگیر دوبہ دار تعلیمی ادارہ غاتا طالب علم آتے منشیات بہاکننگ نااعتراف ہم کرینے۔ ایلو کارروائی تیٹی ضلع چاغی نا غیرآباد علاقہ غان 520 کلوگرام چرس دوئی کننگا۔ پنجگور آن 10 کلوگرام چرس دوئی کننگا۔ چمن آن 39 کلوگرام چرس دوئی کننگا۔ ڈی جی خان اٹی ٹونمی موڑ انا خڑک کاراسے ٹی اودیم کروک آ18 کلوگرام چرس دوئی کرسا اسہ دوبہ دار اسے دزگیرکننگا۔ سخی سرور روڈڈی آئی خان اٹی ٹونمی روڈ انا خڑک دوبہ دار آن 2 کلوگرام آئس دوئی کننگا۔ شیر شاہ ٹول پلازہ ملتان نا خڑک دوبہ دار نا کوزہ غان 2 کلوگرام چرس دوئی کننگا۔ رنگ روڈ پشاور نا خڑک کاراسے نا اودیم خانہ غاتیان 2 کلوگرام آئس و 1.5 کلوگرام ہیرون دوئی کرسا اسہ دوبہ دار اسے دزگیرکننگا۔ ڈی جی خان اٹی سخی سرور روڈ انا خڑک دوبہ دار آن 970 گرام آئس دوئی کننگا۔ ترجمان پارے کہ دزگیر دوبہ دار آتا برخلاف انسداد منشیات ایکٹ انا رداٹ مقدمہ غاتے نوشتہ کرسا جاست وپاست نا بناءِ کننگانے۔
