پاکستان و چین نا نیام اٹ خلائی بشخ اٹی کمکاری اہم ءُ مزل نا نشان اسے، حکومت نا خلائی پٹ وپول نا بشخ انا شونداری آ خاص چکار ءِ، عطاء اللہ تارڑ

اسلام آباد۔ 28 فروری (اے پی پی) بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ پاکستان وچین نا نیام اٹ خلائی بشخ اٹی کمکاری ءِ اہم ءُ مزل نا نشان اس گوندساپارینے کہ وزیراعظم شہباز شریف نا کماشی ٹی حکومت نا خلائی پٹ وپول نا بشخ انا شونداری آ خاص چکار ءِ۔ داہیت ءِ او جمعہ نادے آ داڑے وزیراعظم ہاؤس اٹی پاکستان وچین نا نیام اٹ خلائی پٹ وپول اٹی کمکاری نا سمجھوتہ نا دستاویز آتا تبادلہ نا دود انا وخت آ گپ وتران کرساپارے۔ بنجائی وزیر حوالکاری پارے کہ پاکستان نا اولیکو مینڈ سپیس مشن نا بابت چین نا سپیس ایجنسی و سپارکو نا نیام اٹ معاہدہ اسہ اہم ءُ مزل نا نشان اسے ہراڑآ چین نا حکومت نا منت وار اُن۔ اوپارے کہ وزیراعظم نا وژن ءِ مون آتخسا سپارکو نا گام گیج ستاکڑزک۔ بنجائی وزیرپارے کہ پاکستان وچین نا نیام اٹ خلائی بشخ اٹی کمکاری گمر نا قابل ءِ، خلائی پٹ وپول اٹی کمکاری آن چین نا خلاباز پاکستانی خلاباز آتے تربیت ایترہ ۔ انشاء اللہ اسہ سال انا مد اٹی پاکستانی خلاء باز چائنیز سپیس سٹیشن اٹی سفر کننگ کیرہ۔ اوپارے کہ وزیراعظم شہباز شریف نا کماشی ٹی حکومت نا خلائی پٹ وپول نا بشخ انا شونداری آ خاص چکار ءِ۔ ان شاء اللہ پاکستان نا سوز ہلالی بیرک خلا۔ ٹی ہم کاہک۔ دابھاز بھلو سرسہبی اسے ہراڑآ نن تینا چینی سنگت آتا منت واراُن۔