اسلام آباد۔ 28 فروری (اے پی پی) وزیراعظم محمد شہباز شریف پارینے کہ پاکستا ن وچین نا نیام اٹ خلائی پٹ وپول اٹی کمکاری نا سمجھوتہ پاک چین سنگتی نا پوسکن ءُ بشخ اسے، سمجھوتہ غان ہڑتوم آملک آتا نیام اٹ سوگو سنگتی نا عکاسی مننگ ءِ، پاک چین اقتصادی راہداری نا عظیم ڈٹ انا کمک اٹ پاکستان اٹی بھلا بھلا ڈٹ آتے پورو کننگا، سپارکو ءِ پاک چین خلائی کمکاری آن پبی وڑاٹ فائدہ ہرفوئی مریک۔ جمعہ نادے آ داڑے پاکستان و چین نا نیام اٹ خلائی پٹ وپول اٹی کمکاری نا سمجھوتہ نا دستاویز نا تبادلہ نا بابت اڈ ہلوک دود آن تران کرساوزیراعظم پارےکہ پاکستان و چین نا نیام اٹ خلائی پٹ وپول اٹی کمکاری نا سمجھوتہ پاک چین سنگتی نا اسہ پوسکن ءُ بشخ اسے و داڑآن ہڑتوم آملک آتانیام اٹ سوگو سنگتی نا عکاسی مننگ ءِ ، داسمجھوتہ غان مست پاکستانی خلاءبازآتے چینی خلائی اسٹیشن آ ہِننگ نا تربیت نا وارخواہی دُوبریک، داسمجھوتہ غان چینی حکومت نا کنڈآن ایلو بشخ آتیان بیدس خلائی پٹ وپول نا بشخ اٹی پاکستان تون کمکاری ءِ سوگو کننگ نا ہم عکاسی مننگ ءِ۔ وزیراعظم پارے کہ او چین نا صدر شی جن پنگ نا منت واراُن ہرا نئے بیرہ دابشخ ءِ بلکن 2015ء آن چین پاکستان اقتصادی راہداری آ ترندی اٹ عملدرآمد نا دروشم اٹ پاکستان تون کمک و ملکی زرگزران ءِ سوگو کننگ اٹ تینا کڑد ءِ ادا کرے۔ داعظیم ڈٹ انا کمک اٹ پاکستان اٹی بھلا بھلا ڈٹ آتے پورو کننگا۔ وزیراعظم پارے کہ پاکستان اٹی سپارکو نا ادارہ 1961ء ٹی جوڑمسوسس ولے نن دانا جاچ ءِ ہلین تو دابشخ اٹی نن خاص شون ہلتنون، پاکستان داسہ چین اتون دا پروگرام ءِ مون آدننگ ءِ، ننے نئے بیرہ دادے سرسہب کروئی ءِ بلکن لیڈرشپ و خواری نا کمک اٹ تینا ورناتیکن پوسکن ءُ کسر و پوسکن ءُ وارخواہی پٹنگ تون اوار اوار اوفتا است خواہی تے بارآور کروئی مریک۔ وزیراعظم پارے کہ سپارکو آ دابابت بھلو زمواری اس بیٹ مریک ، سپارکو ءِ داکمکاری آن پبی وڑاٹ فائدہ ہرفوئی مریک۔
