اسلام آباد۔ 28 فروری (اے پی پی) ترجمان دفترخارجہ شفقت علی خان پارینے کہ پاکستان وآذربائیجان واپار و زرکاری تون اوار چندی بشخ آتیٹی کمکاری ءِ پین سوگو کننگ و توانائی، انفراسٹرکچر و زرکاری نا بشخ آتیٹی اسیجائی زرکاری نا ڈٹ آتے پٹنگ نا است خواہی نا درشانی ءِ کرینو۔ داہیت ءِ او جمعہ نادے آ داڑے پریس حوال اٹی پارے۔ اوپارے کہ آذربائیجان نا صدر الہام علیوف نا سلہ غا وزیراعظم محمد شہباز شریف 24 آن 25 فروری اسکان آذربائیجان نا سرکاری دورہ کرے۔ اوپارے کہ دادورہ ہڑتوم آ ملک آتا نیام اٹ چندی بشخ آتیٹی کمکاری ءِ مون آ دننگ کن چندی معاہدہ و مفاہمت نامہ غاتیا دستخط تون ایسر مس۔ ترجمان دفترخارجہ پارے کہ صدر شوکت مرزایوف نا سلہ غا وزیراعظم محمد شہباز شریف 25 آن 26 فروری اسکان جمہوریہ ازبکستان نا سرکاری دورہ ءِ کرے، دورہ پاکستان و ازبکستان نا نیام اٹ تاریخی و برادرانہ تعلقداری تےتالان کرے، و ہڑتوم آملک آتا سرکڑدہ غاتا کمکاری ءِ پین سوگو کننگ نا عزم انا درشانی ءِ کرے۔ اوپارے کہ دورہ ٹی ہڑتوم آملک آک واپار، رابطہ ، دودوربیدہ و مخلوق نا نیام اٹ ہن و برکون آ چندی بشخ آتیٹی کمکاری ءِ گچین کننگ نا بارواٹی تینا نقطہ نظر نا اشتراک کریر۔ ترجمان پارے کہ گپ وتران اٹی ڈیہہ اٹی امن، سوگوی و شونہالی ءِ مون آ دننگ نا تین پہ تینی مسخت نا رداٹ ٹرانس اوغان ریلوائی و واپاری راہداری تا کمک اٹ علاقائی رابطہ غاتے مون آدننگ آ زور شاغنگا۔
