چیئرمین سینیٹ سید یوسف رضاگیلانی تون آئرلینڈ نا سفیر میری اونیل نا اوڑدہی

اسلام آباد۔ 28 فروری (اے پی پی) چیئرمین سینیٹ سید یوسف رضاگیلانی تون آئرلینڈ نا سفیر میری اونیل جمعہ نادے آ داڑے اوڑدہی کرے و ہڑتوم آکنڈآتا تعلقداری، واپار، پارلیمانی رابطہ، تعلیم، دودوربیدہ ئی و چاگڑد نا گام گیج آتا امور آ سرجمی اٹ گپ وتران کرے۔ سینیٹ سیکرٹریٹ آن جاری اعلامیہ نا رداٹ آئرلینڈ نا سفیر تون گپ وتران کرسا چیئرمین سینیٹ پارے کہ پاکستان آئرلینڈ تون پارلیمانی ، زرگزرانی و سفارتی تعلقداری تے پین سوگو کننگ نا خواہندار ءِ، پاکستان وآئرلینڈ نا تعلقداری اسیجائی جمہوری قدر، السی رابطہ و کثیر الجہتی کمکاری آ تالان ءِ، پاکستان و آئرلینڈ جہانی امن، انسانی امداد و پائیدار شونداری نا اسیجائی مسخت تخرہ، آئرلینڈ نا جہانی امن، انسانی امداد و پائیدار شونداری ٹی خذمت ستاکڑزک۔ چیئرمین سینیٹ اوڑدہی ٹی تینا ساڑی آ دورہ آئر لینڈ نا ذکر ءِ کرے و پارے کہ ہڑتوم آملک آتا مہرومریبت و شرف نا رشتہ ءِ۔ سید یوسف رضاگیلانی پاکستان وآئرلینڈ نا نیام اٹ بجٹ ومالیاتی پالیسی تیا تکنیکی کمکاری آ ودفنگ آ زور شاغا۔ اوپارے کہ ہڑتوم آملک آتیٹی ٹیکنالوجی، کشت وکشار، قابل تجدید توانائی و دواسازی نا بشخ آتیٹی کمکاری نا گیشتر گنجائشت ساڑی ءِ۔ پاکستان و آئرلینڈ نا نیام اٹ واپار و زرکاری نا مون آ دننگ المی ءِ۔ پاکستان و آئرلینڈ نا نیام اٹ تعلیمی کمکاری، طالب علم آتا ہن و بر و اسیجائی پٹ وپول ڈٹ آتے مون آ دننگ المی ءِ۔ چیئرمین سینیٹ پارے کہ اسیجائی پٹ وپول و تعلیمی وظیفہ غاتیٹی ودکی نا گرج ءِ، ایس آئی ایف سی ءِ جوڑ کننگاہراڑآن زرکاری وواپاری رابطہ غاتے مون آدننگک، موسمیاتی بدلی، سوزتوانائی وپائیدار شونداری نا بشخ آتیٹی اواری اٹ کاریم کننگ نا گرج ءِ۔ پاکستان و آئرلینڈ اٹی دودوربیدہ ئی تعلقداری تا مون آدننگ کن خصوصی پروگرام تا اڈتننگ وخت انا اہم گرج ءِ ۔ چیئرمین سینیٹ سید یوسف رضاگیلانی آئرلینڈ نا پارلیمانی ڈل ءِ دورہ ءِ پاکستان نا سلہ خلک۔ اوپارے کہ ہڑتوم آکنڈآتا پارلیمانی رابطہ غاتیان ہڑتوم آملک آتا نیام اٹ سفارت کاری ءِ پین مون آدننگ مریک۔ ہڑتوم آ ملک آتا پارلیمان تیٹی فرینڈ شپ گروپ نا جوڑ کننگ آن السی کہول آ رابطہ غاتے پین مو ن آدننگک۔ پاکستان و آئرلینڈ نا نیام اٹ ادارہ جاتی شونداری ٹی تین پہ تینی سلابت المی ءِ، آئرلینڈ ٹی پاکستانی کمیونٹی ہڑتوم آملک آتا نیام اٹ دوستانہ تعلقداری ٹی پول انا کڑد ادا کننگ ءُ، پاکستانی ڈل انا آئرلینڈ نا دورہ غان بجٹ نا شفافیت و مالیاتی نگرانی نا بابت اہم معلومداری دوئی مس۔ آئرلینڈ نا سفیر چیئرمین سینیٹ سید یوسف رضاگیلانی نا گپ وتران آتیان امنا کرے۔ آئرلینڈ نا سفیر ہڑتوم آملک آتا نیام اٹ غٹ گمانی بشخ آتیٹی کمکاری ءِ ودفنگ نا عزم انا درشانی ءِ کرے۔