اسلام آباد۔ 28 فروری (اے پی پی) وزیراعظم محمد شہباز شریف پارینے کہ پوسکن آبنجائی وزیر، وزیر مملکت و سلاہکار آتا گچین کاری ءِ قابلیت و لائخی تا بنداو آ کننگانے، نن غٹ اللہ تعالیٰ و الس نا عدالت اٹی جوابدہ اُن، کابینہ باسک آتا کارکڑد نا باقاعدہ و پدریسہ تینٹ جاچ ءِ ہلیوہ۔ جمعہ نادے آ وزیراعظم آفس نا میڈیا ونگ انا کنڈآن جاری بیان نا رداٹ داخیال آتا درشانی ءِ او ناشتہ غا بنجائی وزیر، وزیر مملکت وسلاہکار آتون گپ وتران کرساکرے۔ وزیراعظم بنجائی کابینہ نا پوسکن آ باسک آتا اعزاز اٹی ناشتہ نا بست وبند ءِ کرے۔ اوپارے کہ نما غٹ انا گچین کاری ءِ نما قابلیت و لائخی تا بنداوآ کننگانے، نن غٹ اللہ تعالیٰ و الس نا عدالت اٹی جوابدہ اُن، اسہ سال انا وخت اٹی کبینی ٹی خاطر خواہ کمتی ، زرمبادلہ نا کوڑی تیٹی ودکی، زرراہی تس اٹی ودکی و ایلو زرگزرانی ٹک آک برو ک آ سال آتیٹی پین گچین کننگ کن سخت خواری ءِ برجاتخنہ۔ وزیراعظم پارے کہ غٹ بنجائی وزیر و کابینہ نا ایلو باسک آتا کارکڑد نا باقاعدہ و پدریسہ جاچ ءِ تینٹ ہلیوہ، السی نمائندہ غاتا وڑاٹ نما غٹ انا خذمت ستاکڑزک۔ بنجائی کابینہ نا باسک آک ملکی شونداری و السی راجی آسودہی کن فعال کڑد ادا کننگ نا عزم انا درشانیءِ کریر و ساڑی آ زرگزرانی شونداری آ وزیراعظم ءِ خراج تحسین پیش کریر۔ اوڑدہی ٹی ملکی زرگزرانی حالیت و سیاسی امور آ گپ وتران ہم مس۔
