اسلام آباد۔ 27 فروری (اے پی پی) ابوظہبی نا ولی عہد شہزادہ شیخ خالد بن محمد بن زید النہیان پاکستان نا سرکاری دورہ غا اسلام آباد آ سرمس۔ صدر مملکت آصف علی زرداری و وزیراعظم محمد شہباز شریف نورخان ایئربیس آ شرفمند آ مہمانءِ جم وجوش اٹ بخیرکریر۔ او اسہ ایلو تون خمب ہلکر و اسہ ایلو تون گرم جوشی اٹ جوڑبڑکریر۔ صدر مملکت آصف علی زرداری، وزیراعظم محمد شہباز شریف و ابوظہبی نا ولی عہد نا نیام اٹ خوشگوار جملہ غاتا ہم تبادلہ مس و اواسہ ایلو کن خیرخواہی نا جوزہ نا درشانی ءِ کریر۔ روایتی لویس اٹی ملبوس اِراچناابوظہبی نا ولی عہد ءِ پھل پیش کریر۔ داوخت آ نائب وزیراعظم و وزیرخارجہ محمد اسحاق ڈار و خاتون اول آصفہ بھٹو زرداری ئسک ہم ساڑی ئسر۔شیخ خالد بن محمد بن زید النہیان تون اوار بڑزکو کہول انا اسہ ڈل اس ہم پاکستان آ بسنے ہراٹی وزیرآک، بڑزکوکمامدارآک و پنی آ کاروباری شخصیت آک اوار ءُ۔ ابوظہبی نا ولی عہد وزیراعظم محمد شہباز شریف نا سلہ غا پاکستان نا اولیکو سرکاری دورہ ءِ کننگ ءِ۔ اونا بیابخیری کن بنجائی دارالحکومت اسلام آباد ءِ زیبائی اٹ بیرفنگانے، شرفمند آ مہمان نا کسر اٹی خیرگامی بینر و بیرک خلنگانے۔ پاکستان ویواے ای نا بیرک آتے ہرفوک چنکاچنکا چناک شرفمند آ مہمان ءِ بخیراٹ پاریر۔ ابوظہبی نا ولی عہد نادورہ ءِ پاکستان و متحدہ عرب امارات نا نیام اٹ برادرانہ تعلقداری تے تالان کیک و ہڑتوم آ کنڈآتا اقتصادی شریداری ءِ پین سوگو کننگ نا اسیجائی عزم انا عکاسی ءِ کیک۔ دورہ ٹی ولی عہد پاکستان نا سرکڑدہ غاتون تین پہ تینی است خواہی نا امور تیا گپ وتران، تاریخی رشتہ غاتے سوگو کننگ و اقتصادی و زرکاری ٹی کمکاری ءِ مون آ دننگ کن گپ وتران کیک۔ دورہ ٹی کثیر جہتی بشخ آتیٹی مریس مدی کمکاری کن ساڑی آ سوگو فریم ورک ءِ سوگوی تننگ کن کیہی معاہدہ و مفاہمت نا یات داشت آتیا ہم دستخط کننگک۔
