اسلام آباد۔ 27 فروری (اے پی پی) وزارت خزانہ پارینے کہ اہم زرگزرانی ٹک آتیٹی نمان گچینی بننگ ءِ، زرراہی تس و برآمد آتیٹی ودکی وخت اس کہ افراط زر و پالیسی ریٹ اٹی کمتی آن زرگزرانی گچینی نا عکاسی مننگ ءِ، فروری ٹی افراط زر انا کچ اِرٹ آن مسہ درسد اسکان وخت اس کہ مارچ اٹی مسٹ آن چار درسد نا نیام اٹ مننگ نا گمان ءِ۔ داہیت ءِ وزارت خزانہ نا کنڈآن جاری کروک تُوئی اقتصادی اپ ڈیٹ اٹی پاننگانے ہرانا رداٹ جنوری ٹی زرراہی تس نا کچ 3.002ارب ڈالر ریکارڈ کننگا ہرا تدوک آ سال جنوری نا 2.398 ارب ڈالر نا مقابلہ ٹی 25.2 درسد زیات ءُ۔ جنوری ٹی برآمد آتا کچ 2.940 ارب ڈالر ریکارڈ کننگا ہرا تدوک آ سال جنوری نا 2.680 ارب ڈالر نا مقابلہ ٹی 9.7 درسد زیات ءُ۔ درآمد آتا کچ 5.455 ارب ڈالر ریکارڈ کننگا ہرا تدوک آسال جنوری نا 4.669 ارب ڈالرنا مقابلہ ٹی 16.8 درسد زیات ءُ۔ حسابات جاریہ نا کھاتہ غاتا نسخان 420 ملین ڈالر ریکارڈ کننگا۔ جنوری ٹی براہ راست درملکی زرکاری نا کچ 194 ملین ڈالر وخت اس کہ جم درملکی زرکاری نا کچ 99.2 ملین ڈالر ئسر۔ جولائی آن جنوری اسکان نا مد اٹی زرمبادلہ نا کوڑی تا کچ 15.948 ارب ڈالر ریکارڈ کننگا۔ 14 فروری آ ایکسچینج ریٹ 279.21 روپئی ریکارڈ کننگا ہرا تدوک آ سال 14 فروری آ 279.32 روپئی ئسر۔ جولائی آن دسمبر اسکان نا مد اٹی ایف بی آر نا جم محصولات آتا کچ 6497.4 ارب روپئی ریکارڈ کننگا ہرا تدوک آ مالی سال انا ہندا مد 5149.6 ارب روپئی نا مقابلہ ٹی 26.2 درسد زیات ءُ۔ جنوری ٹی ایف بی آر نا محصولات نا کچ 872.6 ارب روپئی ریکارڈ کننگا ہرا تدوک آ سال جنوری نا 680.3 ارب روپئی نا مقابلہ ٹی 23.8 درسد زیات ءُ۔ جولائی آن دسمبر اسکان نان ٹیکس ریونیو نا کچ 3602ارب روپئی ریکارڈ کننگا ہرا تدوک آ مالی سال انا ہندا مد انا 1979.1 ارب روپئی نا مقابلہ ٹی 82 درسد زیاتءُ۔ جولائی آن دسمبر اٹی مالی نسخان نا کچ 1537.9 ارب روپئی ریکارڈ کننگا ہرا تدوک آ مالی سال انا ہندا مد انا 2407.8 ارب روپئی نا مقابلہ ٹی 36.1 درسد کم ءُ۔ پرائمری بیلنس نا کچ 3603.7 ارب روپئی ریکارڈ کننگا ہرا تدوک آ سال انا ہندا مد انا 1812.2 ارب روپئی نا مقابلہ ٹی 98.9 درسد زیات ءُ۔ یکم جولائی آن 14 فروری اسکان نا مد اٹی نجی بشخ ءِ 742.1 ارب روپئی نا وام تننگا ہرا تدوک آ سال انا ہندا مد اٹی 246.8 ارب روپئی ئسر۔ تدوک آ سال جون نا ایسر آ پالیسی ریٹ 22 درسد ئس ہرا 7 جنوری 2025 آ کم مرسا 12 درسد مسنے۔
