لیبیا نا کشتی شکست اٹی زوال کروک آ 6 پاکستانی تا میت آک وطن آ سرمسر

اسلام آباد۔ 27 فروری (اے پی پی) لیبیا نا کشتی شکست اٹی زوال 6 پاکستانی تا میت آک وطن آ سرمسنو، بنجائی وزیر ہاؤسنگ اینڈ ورکس میاں ریاض حسین پیرزادہ اسلام آباد بالی پٹ آ میت آتے وصول کرے۔ وزارت ہاؤسنگ اینڈ ورکس انا ترجمان نا رداٹ داوخت آبنجائی وزیر ہاؤسنگ اینڈ ورکس پارے کہ 5 فروری آ پیش مروک آ سانحہ ملک انا چندی خاہوت آتے ماتن اٹ مبتلاکرینے ، او خاہوت آتا غم اٹی بریبرنا شریک ءِ۔ اوپارے کہ حکومت ہرممکن کہول آ زہمی تا خاہوت آتون سلوک ءِ، نن زوال کروک آتا میت آتے اوفتا سیال وقریب آتسکان سرکننگ کن غٹ المی بست وبند کرینن۔ ریاض حسین پیرزادہ پارے کہ ایلو زوال کروک آ بندغ آتا میت آتے زوت وطن آ پدی اتینہ، لیبیاٹی زندہ بچوک آ 37 پاکستانی تا پدی اتنگ کن ہم کوشست برجاءِ۔ اوپارے کہ داسانحہ ننے داسبخ ءِ ایتک کہ غیرکانودی ذریعہ اٹ یورپ آ ہِننگ نا کوشست اخہ در خطرناک مننگ کیک۔ وزیر ہاؤسنگ  ورناتیان خواست کرے کہ او داوڑنا خطرناک کسر ءِ ہلپس و کانودی ذریعہ اٹ پیشن نا ملک آ ہننگ نا کوشست کیر۔ ریاض حسین پیرزادہ زوال کروک آتا خاہوت آتون ہمدردی نا درشانی ءِ ہم کرے۔ بالی پٹ آ ایماندار تا خاہوت آتا آسراتی کن ڈیسک اس جوڑ کننگانے وخت اس کہ زوال کروک آ بندغ آتا میت آتے پشاور آ دننگ کن ایمبولینس آتا بست وبند ہم کننگانے۔ وطن آ پدی اتوک آ 6 میت آتیٹی مصور حسین ولد شیرمہدی ضلع کرم، شعیب علی ولد محمد علی ضلع کرم، محمد علی شاہ ولد عبداللہ شاہ اورکزئی، عابد حسین ولد محمد حسن، موصاب حسین ولد جمیل حسین و شعیب حسین ولد نور علی ضلع کرم اوار ءُ۔