اسلام آباد۔ 27 فروری (اے پی پی) وزیراعظم محمد شہباز شریف ازبکستان نا صدر شوکت مرزایوف نا سلہ غا 25 آن 26 فروری اسکان جمہوریہ ءِ ازبکستان نا سرکاری دورہ ءِ کرے۔ پنچ شنبے نادے آ دفترخارجہ نا کنڈآن جاری بیان اٹی دورہ ٹی پاکستان وازبکستان نا نیام اٹ تاریخی و ایلمی تعلقداری تیا زور شاغنگا و ہڑتوم آملک آتا سرکڑدہ غاک تین پہ تینی کمکاری ءِ پین سوگو کننگ نا عزم انا درشانی ءِ کریر۔ دورہ ٹی ہڑتوم آملک آک واپار، رابطہ ، دودوربیدہ و السی ہن وبرکون آچندی بشخ آتیٹی کمکاری ءِ گچین کننگ نا بارواٹی تینا نقطہ نظرنا اشتراک کریر۔ بیان اٹی مستی پاننگاکہ گپ وتران اٹی ڈیہہ اٹی امن، سوگوی و شونہالی ءِ مون آدننگ نا تین پہ تینی مسخت نا رداٹ ٹرانس اوغان ریلوائی وواپاری راہداری تا کمک اٹ علاقائی رابطہ غاتے مون آ دننگ آ زور شاغنگا۔ وزیراعظم 25 فروری آ تاشقند اٹی پاکستان۔ازبکستان بزنس فورم آن تران ہم کرے ہرا زرکاری نا وارخواہی و گمانی اسیجائی ڈٹ آتے پٹنگ کن ہڑتوم آملک آتا پنی آ کاروباری راہشون تے یکجا کرے۔ بیان نا رداٹ تدوک آسال تیٹی پاکستان وازبکستان نا نیام اٹ تعلقداری بڑزکو کہولی رابطہ، اقتصادی شریداری ٹی ودکی و علاقائی و جہانی فورم تیا کمکاری اٹ سوگومسنے۔ دادورہ چندی مفاہمتی یات داشت و معاہدہ غاتیا دستخط تون ایسر مس ہرانا مسخت اسیجائی فائدہ غاتا بشخ آتیٹی کمکاری ءِ ودفنگ ءِ۔ وزیراعظم نا دورہ نا ایسر آ اسیجائی بیان اس ہم جاری کننگا۔
