تاشقند۔ 26 فروری (اے پی پی) پاکستان و ازبکستان دفاع، ٹیکنالوجی، تکنیکی تربیت، میڈیا وورناتے واکدار کننگ نا بشخ آتیٹی ہڑتوم آکنڈآتا کمکاری ءِ سوگو کننگ کن چندی معاہدہ و مفاہمت نا یات داشت آتیا دستخط کرینو۔ چارشنبے نادے آ دادستاویز آتیا وزیراعظم شہباز شریف نا اِرادے ئی دورہ ءِ ازبکستان اٹی شوکت مرزایوف نا سلہ غا دستخط کننگا۔ ہڑتوم آ راہشون تا ہڑتوم آکنڈآتا اوڑدہی و ڈل آتا کہول آ مروک آ گپ وتران آن پد وزیراعظم شہباز و صدر شوکت مرزایوف دستخط نا دود اٹی بشخ ہلکر وخت اس کہ ہڑتوم آ کنڈآتا کمامدارآک چندی بشخ آتیٹی کمکاری نا معاہدہ و مفاہمت نا یات داشت آتامہالو آن دستخط مروک دستاویز آتے اسہ ایلو ءِ تسر۔ نائب وزیراعظم ووزیرخارجہ سینیٹر محمد اسحاق ڈار و ازبک وزیرخارجہ بختیار سیدوف سفارتی پاسپورٹ تخوک آتیکن ویزہ فری سفر، ملٹری انٹیلی جنس، داخلی امور، کسبی و تکنیکی تربیت و سفارتکار آتا تربیت نا بشخ آتیٹی معاہدہ غاتا دستاویز آتا تبادلہ کریر۔ سائنسی پٹ وپول، ٹیکنالوجی و اختراع نا بشخ آتیٹی کمکاری کن ہڑتوم آفریق آتا نیام اٹ اسہ پین بین الحکومتی معاہدہ سے آ دستخط کننگا۔ وزیرواپار جام کمال خان و ازبک نائب وزیراعظم خدجایوف جمشید دستاویز آتا تبادلہ کریر۔ وزیرحوالکاری و شینکاری عطاء اللہ تارڑ و ازبکستان نا نیشنل انفارمیشن ایجنسی نا ڈائریکٹر جنرل کوچیموف عبدالسعید ہڑتوم آملک آتا نیام اٹ خبرآتا بشخ اٹی کمکاری کن ایسوسی ایٹڈ پریس آف پاکستان (اے پی پی) و ازبک حوالکاری ایجنسی(یوزیڈاے) نا نیام اٹ کمکاری نا معاہدہ غاتا دستاویز اسہ ایلو ءِ تسر۔ نائب وزیراعظم اسحاق ڈار و تاشقند نا میئر شوکت عمرزاکوف برانووچ لاہور و تاشقند نا نیام اٹ مفاہمت نا دستاویز اسہ ایلو ءِ تسر۔ وزیرحوالکاری و شینکاری عطاء اللہ تارڑ و ازبکستان نا یوتھ افیئر ایجنسی نا ڈائریکٹر سعداللہ ئیف علیشیر وزیراعظم یوتھ پروگرام و ازبکستان نا حکومت نا نیام اٹ ورناتا امور نا بابت ایم اویونا دستاویز آتے اسہ ایلو ءِ تسر۔ اوکان پد وزیراعظم شہباز شریف و صدر مسکوہی وزیراعظم نا دورہ غاتا نتیجہ و بڑزکو کہولی سٹریٹجک کمکاری کونسل نا قیام نا پروٹوکول نا بابت اسیجائی اعلامیہ غا دستخط کریر۔
