تاشقند۔ 26 فروری (اے پی پی) پاکستان و ازبکستان شونہالی و شونداری نا اسیجائی عزم انا درشانی ءِ کرسا آخبت خڑک اٹی ہڑتوم آ کنڈآتا واپار نا کچ ءِ ساڑی آ 400 ملین ڈالرآن 2 ارب ڈالر اسکان ودفنگ، علاقائی رابطہ غاتا مو ن آدننگ کن ٹرانس اوغان ریلوائی ڈٹ آتون اوار مواصلات، واپار، معدنیات ، سیل و سوات ، کشت وکشار ، سائنس وٹیکنالوجی و ایلو بشخ آتیٹی کمکاری ءِ مون آ دننگ آامنا کرینو۔ وزیراعظم محمد شہباز شریف پارینے کہ ازبکستان پاکستان نا باپت شریدارءِ، واپار، زرکار و واپار اٹی ودکی ہڑتوم آملک آتا فائدہ غاتیٹی ءِ، ٹرانس اوغان ریلوائی ڈٹ مچ آڈیہہ اکن گیم چینجر پک مریک، اوغانستان اٹی امن و سوگوی ڈیہہ انا فائدہ غاتیٹی ءِ، اوغانستان نا گل زمین پاکستان تون اوار پین ملک اسے آ جلہو کن کاریم اٹ اتنگپ، پاکستان غزہ نا مظلوم الس نا مخ تفی ءِ برجاتخک وخت اس کہ ازبکستان نا صدر شوکت مرزایوف پارے کہ جہانی چیلنج آتیان پد ہم ہڑتوم آملک آتا نیام اٹ روشناآخبت کن معاہدہ بھاز اہم ءِ ، چندی بشخ آتیٹی کمکاری ءِ مون آدینہ، فضائی جہاز آتا کچ اٹی ودکی کننگک، تینا پرخلوص سنگتی ءِ پین سوگو کینہ۔ داخیال آتا درشانی ءِ او چارشنبے نادے آ داڑے پاکستان و ازبکستان نا نیام اٹ چندی بشخ آتیٹی کمکاری نا معاہدہ و مفاہمت نا یات داشت آتیا دستخط آتیان پد اسیجائی پریس کانفرنس آن تران کرساکرے۔ وزیراعظم محمد شہباز شریف پارے کہ ای گچین مہمانداری آ ازبکستان نا صدر شوکت مرزایوف نا منت واراُٹ، پاکستان و ازبکستان نا تعلقداری پیڑی تیا تالان ءُ و ننا تعلقداری تا اسہ تاریخ اسے، شاہراہ ریشم آن بناکروک آ تاریخی تعلقداری تے پوسکن آ بڑزی تیا دینہ، ننا مستین اسٹ ءِ، ظہیر الدین بابر، امیر تیمور و سمرقندو بخاراتون ننا اسہ متکن ءُ تعلق اسے۔ اوپارے کہ ہڑتوم آملک آتا تعلقداری سہی کنڈاٹ جوان وڑاٹ ترندی اٹ مون آ ہِننگ ءُ و دا تعلقداری تے زرکاری و واپار نا بنداو آ مربوط کننگ انگ ءِ۔ اوپارے کہ ازبکستان و پاکستان نا سٹریٹجک شریداری نا بھاز اہمیت ءِ نن ازبکستان ءِ اسہ باپت شریدار اس تکنہ، زرکاری و واپار اٹی ودکی ہڑتوم آملک آتا فائدہ غاتیٹی ءِ۔ اوپارے کہ صدر شوکت مرزایوف تون ون آن ون اوڑدہی و ڈل آتا کہول آ گپ وتران اٹی اونا کنڈآن ہراجوزہ غاتا درشانی ءِ کننگا نن اوفتے مدام یات تخنہ، ننا است خواہی ءِ کہ ہڑتوم آملک آتا نیام اٹ تعلقداری ءِ پین سوگوی ملک و شونداری وشونہالی نا مزل نا کنڈآ مون آکان۔ وزیراعظم پارے کہ صدر شوکت مرزایوف تینا ملک ءِ بدل کرینے، 2016ٹی او ہراتم اقتدار ءِ سنبھالاسس تو ہمووخت آ تو ازبکستان اٹی نیزگاری نا کچ 42 درسد ئس ہرا داسہ کم مرسا 8 درسد اسکان بسنے۔ صدر شوکت مرزایوف عملی گام آ یخین تخک، ازبکستان اٹی براہ راست درملکی زرکاری ہموتم اسہ ارب 20 کروڑ ڈالر ئس ہرااینو30 ارب ڈالر آن زیات ءُ ہرا اسہ معجزہ سے، ولے معجزہ بیرہ جم وجوش اٹ تقریر آتے اٹ مفک، صدر مرزایوف ازبکستان ءِ شونداری نا پوسکن آ بڑزی تیا درینے، معجزہ وژن، سخت خواری آن دوئی مریک و دا غٹ جوانیک صدر شوکت مرزایوف اٹی ساڑی ءُ۔ وزیراعظم پارے کہ ہڑتوم آملک آتا شونہالی و شونداری ننا اسیجائی عزم ءِ، ای پاکستان نا زرگزرانی شونداری کن سنبرینگوک اُٹ، تینا قائد مسکوہی وزیراعظم محمد نواز شریف نا تروک آ شونداری نا وژن آ ہِننگ ءِ، مرغن آ سفرنا بناء اولیکو گام آن مریک ہرا دے نن ہرفینن، اسہ سال اٹی ننا زرگزران شون ہلکنے، افراط زر انا کچ 38 درسد آن کم مرسا 2.4 درسد آ بسنے، شرح سود ہرا اسہ سال مست 22 درسد ئس داسہ کم مرسا 12 درسد آ بسنے، ننا برآمد آتیٹی ودکی مننگ ءِ، سخت خواری و پکاعزم آن ہی شونداری نا سفر ءِ طے کننگ مریک، تینا ٹیم اتون اوار ہڑتوم آملک آتا نیام اٹ تعلقداری تے پوسکن آ بڑزی تسکان دینہ۔ وزیراعظم پارے کہ پاکستان نا آئی ٹی نا برآمد و کاروباری سرجزآک ودنگءُ، اسہ سال اٹی پاکستان نا زرگزران ءِ تینا نت تیا سلیفینن، دا اقتصادی شونداری کن داسہ بناءِ، ولے دا سفر آسان اف، شونداری وشونہالی نا ہرامسخت ازبکستان دوئی کرینے نن اونا دوئی کننگ کن کوشست کننگ اُن، پالیسی ریٹ اٹی کمتی آن زرکارآتا پت اٹی ودکی مسنے، زرگزرانی شرح نمو ودنگ ءِ۔ وزیراعظم پارے کہ ہڑتوم آملک آتا نیام اٹ چندی بشخ آتیٹی کمکاری نا دستاویز آتیا دستخط کننگانے، ولے داکان ہم مون آہنسا نن اسیجائی وڑاٹ اواری اٹ چلینگ آ امنا کرینن، ٹرانس اوغان ریلوائی رابطہ غاتا مسخت ءِ دوئی کینہ، دا بیرہ پاکستان و ازبکستان کن اف بلکن مچ آڈیہہ اکن گیم چینجر ڈٹ اس مریک۔ وزیراعظم پارے کہ ای نمے باوری کرفیوہ کہ پاکستان دا ڈٹ آتیکن پبی کمک کیک، ازبکستان نا شونداری ماڈل آن فائدہ ہرفنہ، سخت خواری اٹ پاکستان تینا گوہوک آ ہند ءِ دُوارہ دوئی کیک۔ وزیراعظم پارے کہ پاکستان و ازبکستان معدنیات و کانڑ کنی نا بشخ اٹی کمکاری ءِ مون آ دننگ و اسہ ایلو نااقتصادی زون تیٹی زرکاری آ ہم امنا کرینو، ہڑتوم آ کنڈآتا واپاری کچ 400 ملین ڈالر آن ودفسا 2 ارب ڈالر اسکان دینہ ۔ وزیراعظم پارے کہ ہڑتوم آملک آتا نیام اٹ سیل و سوات ءِ مون آدننگک، جہاز آتا کچ اٹی ہم ودکی کننگک، ریلوائی نا کمک اٹ واپار اہمیت تخک، معدنیات نا بشخ اٹی کمکاری آ سرجمی اٹ گپ وتران مسنے، سیل و سوات نا بشخ اٹی اواری اٹ کاریم کینہ، ہڑتوم آملک آتا الس ءِ اسہ ایلو نا تاریخ آن فائدہ ہرفنگ نا موقع ملک، ہڑتوم آملک آتا تعلقداری سہی کنڈآ مون آہِننگ ءِ۔ اوپارے کہ پاکستان وازبکستان نا واپار نا جہانی ادارہ ٹی زوت شمولیت نا خواہندار اُن، ننے اومیت ءِ کہ ہڑتوم آ ملک آتا نیام اٹ طے مروک آمعاہدہ و مفاہمت نا یات داشت آک زوت حقیقت ءُ دروشم اس ہلیرہ۔ اوپارے کہ دے ٹک نیامی نا حالیت آتیا ہم نن گپ وتران کرینن و داہیت آامنا کرین کہ چیلنج نا داوخت اٹی مسلم امہ نا نیام اٹ سیوت وخت انا گرج ءِ۔ وزیراعظم پارے کہ اسہ پرامن وسوگو اوغانستان اس علاقائی رابطہ و علاقہ ٹی امن و شونداری کن المی ءِ، اوغانستان نا گل زمین عسکریت پسند گروپ اسے نا کنڈآن پاکستان تون اوار پین ملک اسے آ جلہو کن بایدے کاریم اٹ اتنگپ، اوغانستان اٹی امن و سوگوی ڈیہہ انا فائدہ غاتیٹی ءِ۔ وزیراعظم پارے کہ پاکستان وازبکستان نا نیام اٹ چندی بشخ آتیٹی کمکاری ءِ مون آدننگ کن رابطہ غاتے پین مون آ دننگک، نن اسیجائی شونہالی و شونداری آ سرجمی اٹ گپ وتران کرینن، ازبکستان نا زرکارآتے پاکستان نا دورہ نا سلہ ءِ خلیوہ۔ اوپارے کہ پاکستان غزہ نا مظلوم الس نا مخ تفی ءِ برجاتخک، فلسطین نا ویل اقوام متحدہ نا قراردادآتیا عملدرآمد آن ہی ایسر مننگ کیک، نن دے ٹک نیامی نا اِراریاستی ایسری نا مخ تفی ءِ کینہ، ہنداوڑ کشمیری الس ہفت عشرہ غاتیان حق خودارادیت کن قربانی تننگ ءُ ، پاکستان مدام اوفتا مخ تفی ءِ کرساکیک۔ ازبکستان نا صدر شوکت مرزایوف پارے کہ وزیراعظم شہباز شریف ءِ ازبکستان نا دورہ غا بخیر اٹ پانہ، ننا اوڑدہی بھاز فائدہ ئی مس، ہڑتوم آملک آتا نیام اٹ چندی بشخ آتیٹی کمکاری ءِ مون آ دننگ آ گپ وتران کننگانے، پاکستان ننا باپت شریدارءِ، ہڑتوم آ ملک آتا نیام اٹ تعلقداری سوگو مننگ ءِ۔ اوپارے کہ جہانی چیلنج آتیان پد ہم روشنا آخبت کن ہڑتوم آملک آتانیام اٹ گپ وتران و معاہدہ بھاز اہمیت تخک، اقتصادی شونداری کن اسہ ایلو تون کمکاری ءِ مون آدینہ۔ مون تروک چیلنج آتون مون تننگ کن اسیجائی لائحہ عمل و وارخواہی تیان فائدہ ہرفنگک، نن ہڑتوم آ کنڈآتا واپاری کچ ءِ ودفسا 2 ارب ڈالر اسکان دینہ۔ اوپارے کہ شونہال آخبت کن نیک است خواہی تا درشانی ءِ کیوہ، ہڑتوم آ ملک آتا نیام اٹ جہاز آتا کچ اٹی ودکی کننگک۔ اوپارے کہ ہڑتوم آملک آتانیام اٹ بین الحکومتی کمیشن گچین وڑاٹ کاریم کننگ ءِ، ہڑتوم آ کنڈآتا تعلقداری ٹی وخت تدینگ انگ تون اوار اوار ودکی مننگ ءِ، تاشقند و لاہور نا نیام اٹ باقاعدہ جہاز ہڑتوم آملک آتیکن فائدہ مند ءِ۔ اوپارے کہ چندی صنعت و ایلو بشخ آتیٹی کمکاری ءِ مون آدننگک، داڑکن بزنس فورم اس اڈتننگ انگ ءِ، پاکستانی کمپنی تے ازبکستان اٹی زرکاری نا بابت معلومدار کینہ۔ اوپارے کہ وزیراعظم شہباز شریف نا دورہ تاریخی اہمیت تخک، پاکستان نا پنی آ کاروباری کمپنی تا نمائندہ غاک تاشقند اٹی ساڑی ءُ۔ اوپارے کہ ہڑتوم آملک آتا نیام اٹ زرکاری و واپار نا مون آ دننگ کن سیر حاصل گپ وتران مننگ ءِ، ہڑتوم آملک آتا نیام اٹ تزویراتی تعلقداری نا پوسکن آ بشخ بناکننگ ءِ، بڑزکو کہولی سٹریٹجک کونسل ءِ فعال کننگک، فارماسیوٹیکل، ٹیکسٹائل، سِل انا صنعت، کشت وکشار و ایلو بشخ آتیٹی کمکاری ءِ مون آدینہ۔ اوپارے کہ ہڑتوم آکنڈآتا گپ وتران آن پد ہڑتوم آملک آک مفاہمت نا یات داشت ومعاہدہ غاتیا دستخط کرینو۔ اوپارے کہ اوغانستان نا راجی شونداری و فلسطین نا ویل اکن سفارتی و انصاف اٹ ایسری کن کوشست کننگک، ٹرانس اوغان ریلوائی پروجیکٹ آہم سرجمی اٹ گپ وتران مسنے، و دابابت چیلنج و اوفتا ایسری آ گپ وتران کننگانے، ریلوائی رابطہ غاتیان واپار ءِ مون آدننگک و مخلوق نا ہن و بر اٹی ہم ودکی مریک، دفاع نا بشخ اٹی ہم کمکاری ءِ مون آدننگک۔ اوپارے کہ اوغانستان نا اسہ ڈل اس ہم ازبکستان نا دورہ ءِ کننگ ءِ ہراڑتون گپ وتران اٹی ننکن اسہ قابل قدر و روحانی میرات اس اِلانے۔ ہڑتوم آملک آک علاقائی و جہانی فورم آ اسہ ایلو تون کمکاری کرسا کیرہ۔ اوپارے کہ بخارا، سمرقند وپاکستان نا چندی شار آتون سیل و سوات ءِ مون آدننگک، ہڑتوم آملک آتا نیام اٹ دودوربیدہ ئی و روایتی بشخ آتیٹی کمکاری ءِ ودفنگک، نن دابابت نمائش و فیسٹیول اڈتننگ کینہ۔ اوپارے کہ نن داہیت آامنا کرینن کہ نن ہڑتوم آکنڈآتا کمکاری نا مون آدننگ کن باقاعدہ روڈ میپ اس تیارکینہ و نن تینا پرخلوص سنگتی ءِ پین سوگو کینہ۔ وزیراعظم شہباز شریف کنے زیبا و بے مٹ گل زمین پاکستان نا دورہ نا سلہ ءِ خلکنے، ای اونا دورہ نا سلہ ءِ امنا کیوہ۔ اوروچہ مبارک نا بابرکت تُو انا بننگ آمبارکبادی ہم تس۔ اوپارے کہ ہڑتوم آکنڈآتا تعلقداری و زرکاری ءِ مون آدننگ وخت انا خواست ءِ، وزیراعظم شہباز شریف نا جوزہ خیرخواہی آ اونا است انا حب اٹ منت واراُٹ۔
