پشاور۔ 26 فروری (اے پی پی) بنجائی وزیر خزانہ و وزیر مملکت خزانہ گورنر خیبرپختونخوا فیصل کریم کنڈی تون گورنر ہاؤس پشاور اٹی اوڑدہی کرینو۔ اوڑدہی ٹی صوبہ نا سیاسی، راجی و زرگزرانی حالیت آتیا گپ وتران کننگا، اوڑدہی ٹی صوبہ ءِ مون تروک مالی ویل آتیا ہم سرجمی اٹ گپ وتران کننگا، گورنرخیبرپختونخوا بنجانا کنڈآن صوبہ ءِ این ایف سی ایوارڈ فنڈ و ضم ضلع غاتیکن شونداری فنڈ آتا جاری کننگ نا باندات ءِ ہم ہرفے، اوڑدہی ٹی ضم ضلع غاتیٹی خراج آتا نفاذ آ بزنس کمیونٹی و قبائلی الس نا گڑتی تیا ہم گپ وتران کننگا۔ داوخت آ گورنر خیبرپختونخوا فیصل کریم کنڈی پارے کہ ضم ضلع غاتے شونداری نا دنگ اٹ اتنگ کن بنجاناکنڈآن قول انا رداٹ شونداری فنڈ جاری کننگ بے کچ المی ءِ۔ افسوز ءِ کہ ضم ضلع غاتیکن اخس کہ فنڈ ز جاری مس اوفتے ہم صوبائی حکومت ضم ضلع غاتیا خڑچ کتو۔ اوبنجائی وزیر خزانہ ءِ صوبہ نا بزنس کمیونٹی نا کنڈآن اقتصادی و زرگزرانی شونداری کن سلاہ ہم پیش کرے۔ بنجائی وزیرخزانہ نا صوبہ نا زرگزرانی و اقتصادی شونداری کن پورو کمکاری نا عزم انا درشانی ءِ کرسا پارے کہ خیبرپختونخوا تون اوار مچ آملک انا بزنس کمیونٹی نا زرگزرانی شونداری کن سلاہ تا شرف ءِ کیک۔ اوپارے کہ مسکوہی فاٹا و پاٹا کمیٹی تیٹی خیبرپختونخوانا بزنس کمیونٹی ءِ نمائندگی تننگانے، بنجاغٹ صوبائی اکائی تے زرگزرانی شونداری نا رفتار اٹی مون آ ہُننگ خواہک۔
