اسلام آباد۔ 26 فروری (اے پی پی) بنجائی وزیر صنعت وپیدوار رانا تنویر حسین تون چارشنبے نادے آ جاپانی کمپنی تا نمائندہ غاک اوڑدہی کریر و برآمد آتیٹی اڑاند و ریفنڈ اٹی تاخیر آ گڑتی نا درشانی ءِ کریر۔ داوخت آ بنجائی وزیر پارے کہ جاپانی کمپنی تا حقی ویل آتے دمدستی وڑاٹ ایسر کینہ، رعایت و آسودہی داسہ برآمدی کچ اتون گنڈوک مریک، صنعت آتے کسبکار افرادی قوت برآمد کرسا آمدنی ٹی ودکی آ چکار کننگے۔ اوپارے کہ حکومت آٹو موبائل سیکٹر اٹی زرکاری کن سازگار چاگڑد اس فراوان کیک، ہندی صنعت آک زیات خراج تننگ ءُ، ہندی صنعت آتے پوسکن آ برآمدی منڈی تا پٹنگ اٹی آسودہی تننگک۔ جہانی منڈی نا مقابلہ کن ہندی صنعت آتے تینا آب ءِ گچین کروئی مریک۔ اوپارے کہ آٹو موبائل انڈسٹری ءِ تینا برآمد آتے ودفنگ کن متحرک مروئی مریک، حکومت صنعت آتے پورو کمک فراوان کننگ ءِ۔ بنجائی وزیر جاپانی آٹو سیکٹر نا نمائندہ غاتے باوری کرفے کہ اوفتا ویل آتے اولیتی بنداو تیا ایسر کننگک۔
