اسلام آباد۔ 26 فروری (اے پی پی) وزیراعظم ناکوآرڈی نیٹر موسمیاتی بدلی و چاگڑدی رابطہ رومینہ خورشید عالم موسمیاتی بدلی ءِ بھلو چیلنج اس گوندساپارینے کہ موسمیاتی بدلی نا چیلنج تون مون تننگ کن گام گیج برجاءِ۔ داخیال آتا درشانی ءِ او چارشنبے نادے آ دود آن تران کرساکرے۔ اوپارے کہ پاکستان چاگڑد دوست گام گیج آتیا عمل کننگ ءِ، پاکستانی قوم موسمیاتی بدلی نا بہادری اٹ مقابلہ ءِ کننگ ءِ۔ رومینہ خورشید عالم پارے کہ پلاسٹک سیکٹر نا جی ڈی پی ٹی 15 درسد بشخ ءِ، پلاسٹک نا سوب آن ننا چاگڑد زہمی مننگ ءِ، ہڑدے ئی بنداو آ نن پلاسٹک آتے کاریم اٹ اتنگ اُن ہرا چاگڑد ءِ زیار آلود کننگ ءُ۔ اوپارے کہ ملک اٹی 11 ہزار آن زیات پلاسٹک یونٹ ءُ ہراڑتون 10 لکھ بندغ وابستہ ءُ۔ وزیراعظم نا کوآرڈی نیٹر موسمیاتی بدلی و چاگڑدی رابطہ پارے کہ ملک اٹی پائیدار صنعت چلیفنگ کن گام گیج کروئی مریک ، چاگڑدی رکھ اکن ننا گام گیج ایلو ملک آتیکن قابل تقلید ءِ۔ اوپارے کہ موسمیاتی بدلی نا بابت سخت فیصلہ بروک آ چین تا بقانا ضامن ءِ۔ رومینہ خورشید عالم پارے کہ موسمیاتی بدلی نا مقابلہ ءِ کننگ کن علاقائی بنداوتیا کاریم کروئی مریک۔
