اسلام آباد۔25فروری (اے پی پی): مزن وزیر محمد شہباز شریف ءَ تاشقند ءَ آجوئی ءِ یادگار ءِ تر ءُ تاب کت ءُ ازبکستان ءِ سیادی ءَ را گیش مھکم کنگ ءِ جزم ءِ درشان کت مزن وزیر ءِ ھمراھی ءَ ازبکستان ءِ مزن وزیر عبداللہ اریپوف ھم ھوار بوت۔ اے تر ءُ تاب ءَ پاکستان ءُ ازبکستان ءِ نیام ءَ یکجائی دود ءُ ربیدگی ءُ سائنسی سیادی ءَ را پدر کنگ بوتگ ءُ دو نیمگی سیادی ءَ را گیش گہتر کنگ ءِ عزم ءِ درشان کنگ بوتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر شہباز شریف ءَ پاکستانی مزن تک ءِ ڈل ءِ ھمبراھی ءَ اے یادگار ءِ سر ءَ گلدستگ ایر کتگ کہ ازبکستان ءِ شانداریں راجدپتر ءُ آجوئی ءِ نیمگ ءَ سفر ءِ علامت اِنت۔ مزن وزیر ءَ ازبکستان ءِ پیشرفت ءُ چیلنج آں گوں دیم پہ دیم بوھگ ءِ توانائی ءِ توسیپ کت، پاکستان ءِ آجوئی ءُ دیمروئی ءِ جہد ءَ گوں ہمگرنچ کنگ ءَ اے موہ ءِ سر ءَ مزن وزیر شہباز شریف ءَ گوشت کہ آجوئی ءِ یادگار ازبکستان ءِ راج ءِ دلیری ءُ جزم ءِ گواہ اِنت۔ پاکستان ءُ ازبکستان ءِ امن، وشھالی ءُ دمگی رابطہ ءِ ھاتر ءَ یکجائی ءِ ھیال ءُ لیکہ ءِ شریک اِنت۔ اے تر ءُ تاب مئے یکجائی قدر ءُ قیمتانی دوبر پدر کنگ ءُ یک وشیں باندات ءِ ھاتر ءَ یکجاہ کار کنگ ءِ ضلورت اِنت۔ یادگار ءِ تر ءُ تاب ءِ ساھت ءَ مزن وزیر ءَ را ازبک راج ءُ آئی ءِ بامرد آنی 3ہزار سالی راجدپتر ءِ بابت ءَ ھم سرپدی دات۔ ایشی ءَ پد مزن وزیر ازبکستان ءِ مزنیں حکام ءِ گوما گند ءُ نند کنت، ایشی ءِ تہ ءَ تجارت، توانائی ءِ شوبگ ءُ دود ءُ ربیدگ ءِ تبادلہ آنی تہ ءَ کمک ءَ را گیش کنگ ءِ سر ءَ دلگوشی دیگ بیت۔ دوئیں ملک دمگی رابطہ ءُ اقتصادی شمولیت ءِ دیمروئی ءِ ھاترا جزم انت۔ مزن وزیر شہباز شریف ءِ ازبکستان ءِ تر ءُ تاب دوئیں ملک آنی نیام ءَ اسٹریٹجک شریکداری ءَ را مھکم کنگ ءِ ھاترا ھاسیں گامگیج انت۔ اے تر ءُ تاب ءِ ساھت ءَ پاکستان ءُ ازبکستان کشت ءُ کشاری، دمگی سیادی، ٹیکنالوجی ءُ وانگ ءُ زانگ ءِ پڑ ءَ کمک ءِ ھوالگ ءَ مفاہمت نامہ ءُ منوگری آنی سر ءَ دستخط کن اَنت ایشی ءَ چہ پاکستان ءُ ازبکستان ءِ نیام ءَ سیادی ءَ را گیش دیمروئی رسیت۔
