تاشقند۔25فروری (اے پی پی): مزن وزیر محمد شہباز شریف ازبکستان ءِ صدر شوکت مرزیایوف ءِ ھاسیں دعوت ءِ پد ءَ 2 روچی تاشقند ءِ تر ءُ تاب ءِ ھاتر ا پج اتگ۔ ازبکستان ءِ مزن وزیر عبداللہ عاریپوف، ازبک وزیر ءِ درئی کار بختیار سیدوف، تاشقند ءِ میئر شوکت عمر زاکوف، ازبکستان ءِ پاکستان ءِ سفیر علی شیر تختیائیف ءُ پاکستان ءِ ازبکستان ءَ سفیر احمد فاروق ءَ ھوار مزن تکی سفارتی ءُ سرکاری کارندہ آں مزن وزیر ءَ را وش اتک کت۔ مزن وزیر تاشقند ءَ آجوئی ءِ یادگار ءِ تر ءُ تاب ءَ کنت، ایشی ءِ تہ ءَ ازبکستان ءِ مزنیں راجدپتری مردم آناں شگر ءُ منت ءِ واستہ گلدستہ ایر کنت ءُ ازبکستان ءِ جوڑیشت ءُ دیمروئی ءُ زہرشانی ءُ محنتی ازبک الس ءِ واستہ وتی نیکیں واھگ آنی درشان کنت۔ مزن وزیر ءَ را یادگار ءِ سر ءَ جوڑ بوتگیں ازبکستان ءِ راجدپتر ءِ 3000سال ءِ کوھنیں کندگ آنی سر ءَ تر ءُ تاب کنگ بیت ءُ اے موہ ءِ سر ءَ بریفنگ ھم دیگ بیت۔ تر ءُ تاب ءِ ساھت ءَ مزن وزیر ازبکستان ءِ صدر شوکت میرزیویف ءِ گوما دو نیمگی گند ءُ نند ءَ ھم کنت ایشی ءِ تہ ءَ ازبکستان ءُ پاکستان ءِ نیام ءَ دمگی رابطہ، تجارت، سرمایہ کاری، توانائی، دفاع، ایمنی، دمگی استحکام ءُ وانگ ءُ زانگ ءِ پڑ ءَ کمک ءَ را گیش دیمروئی دیگ ءِ سر ءَ گپ ءُ تران کنگ بیت۔ دوئیں رہشون وت مہ وتی دلچسپی ءِ جہانی ءُ دمگی جیڈھ آنی سر ءَ ھم گپ ءُ تران کن اَنت۔ گند ءُ نند ءَ پد پاکستان ءُ ازبکستان ءِ نیام ءَ دو نیمگی کمک ءِ ھوالگ ءَ مفاہمت یادداشت ءُ منّگ نامہ آنی سر ءَ ھم دستخط کنگ بیت۔ پاکستان ءُ ازبکستان ءِ کاروباری ءُ سرمایہ کاری کمیونٹی آنی نیام ءَ کمک ءَ را گیش کنگ ءِ واستہ تاشقند ءَ پاکستان ءُ ازبکستان کاروباری فورم ھم برجم دارگ بیت، ایشی ءِ تہ ءَ مزن وزیر بھر زوری کنت ءُ گشتانک دنت۔ مزن وزیر ازبکستان ءِ تعمیراتی صنعت ءِ چار ءُ تپاسی ءِ واستہ تاشقند ءَ ٹیکنو پارک ءِ ھم تر ءُ تاب ءَ کنت۔ نائب مزن وزیر ءُ درئی کارانی وزیر محمد اسحاق ڈار، ، وزیرِ تجارت جام کمال خان، وزیرِ سرمایہ کاری و نجکاری عبدالعلیم خان، وزیرِ اھوالکاری و نشریات عطاء اللہ تارڑ اور معاون خصوصی طارق فاطمی ءُ مزن وزیر ءِ تاشقند ءِ تر ءُ تاب ءِ ساھت ءَ ھمبراہ اتنت۔
