اسلام آباد- 25فروری (اے پی پی): پاکستان ءَ پرتگیزی سفیر فریڈریکو سلوا ءَ راجی ھال رسانکی ادارگ ایسوسی ایٹڈ پریس آف پاکستان ءِ منیجنگ ڈائریکٹر محمد عاصم کھچی ءَ گوں گند ءُُ نند کت ءُ دوئیں ملک آنی سرکاری ھال رسانکی ادارگ آنی نیام ءَ ھال آنی بدلی ءِ تہ ءَ کمک ءِ سر ءَ گپ ءُ تران کت۔ اے موہ ءِ سر ءَ پرتگال ءِ سفیر ءَ دوئیں ملک آنی نیام ءَ بازیں پڑ آنی تہ ءَ کمک ءَ را گیش کنگ ءِ واھشت ءِ درشان کت، ایشی ءِ تہ ءَ وانگ ءُ زانگ، آرٹ ءُُ دود ءُُ ربیدگ، سیل ءُُ سواد، کاروبار ءُ ایسوسی ایٹڈ پریس آف پاکستان (اے پی پی) ءُ پرتگال ءِ راجی ھال رسانکی ادارگ ’’لوسا‘‘ ءِ نیام ءَ ھال آنی تبادلہ ءِ معاہدہ ھوار اِنت۔ سفیر فریڈریکو سلوا ءَ گوشت کہ اے میڈیا ءُ انفارمیشن ٹیکنالوجی ءِ دور انت ءُ دوئیں سرکاری ھال رسانکی ادارگ ھما ھال ءُ اھوالانی مٹ ءُ بدلی ءِ سر ءَ کمک بہ کن انت ایشی ءَ چہ دوئیں ملک آنی الس ءَ را سیت بہ بیت۔ آئی ءَ اے گپ ءِ سر ءَ زور پر دات کہ دوئیں ملک آنی تہ ءَ یکے دومی ءِ گوما بازیں چیز ھوار اَنت ایشی ءِ تہ ءَ مردم آنی نیام ءَ رابطہ آناں دیمروئی دیگ ھوار اِنت۔ آئی ءَ گوشت کہ دوئیں ملک آنی نیام ءَ کمیونیکیشن رابطہ آیوکیں وھد ءَ میڈیا، دود ءُ ربیدگ، کاروبار، سیل ءُ سواد ءَ ھوار جتا جتائیں شوبگ آنی تہ ءَ سیادی ءِ راہ ءَ پچ کنت ایشی ءَ چہ دوئیں راج نزیک بنت۔ گند ءُ نند ءِ تہ ءَ اے پی پی ءِ منیجنگ ڈائریکٹر محمد عاصم کھچی ءَ پرتگیزی سفیر ءَ را دل یکیمی دات کہ دوئیں ملک آنی اُلس ءِ آسراتی ءِ واستہ ھال آنی شوبگ ءَ کمک ءِ واستہ مفاہمت نامہ ءِ سر ءَ دستخط کنگ ءِ عمل ءَ را ترندی دیگ بیت۔ سفیر فریڈریکو سلوا ءِ ہمراہی ءَ پرتگیزی نبشتہ کار ءُ اھوالکار ٹریسا نکولاؤ ہم بوتگ کہ آ 22 ءَ چہ 27 فروری ءَ پاکستان ءِ تر ءُُ تاب ءَ انت۔ اے موہ ءِ سر ءَ ٹریسا نکولاؤ ءَ پاکستان ءَ وتی منگنیانی بابت ءَ گپ جت ءُ گوشت کہ آئی ءَ پاکستان ءَ مزنیں وھدے گوازینگ ءَ انت آئی ءَ لاہور ءَ لبزانکی میلہ ءُُ اسلام آباد ءَ دگہ مراگشاں بہر زرتگ۔ آئی ءَ پاکستان ءِ جتائیں ءُ وشھالیں دود ءُ ربیدگ ءُ مسالہ دار ءُ وشیں روایتی ورگ آنی توسیپ کت۔ ٹریسا نیکولاؤ ءَ پاکستان ءِ جتا جتائیں دود ءُ ربیدگ ءُ لبزانکی میراث ءِ ارزشت ءَ را پدر کنان ءَ دوئیں دوستیں ملک آنی الس ءَ را دود ءُ ربیدگ ءِ وسیلگ ءَ یکجا کنگ ءِ واستہ یکجائی کوشست آنی ضلورت ءِ سر ءَ زور پر دات۔
