باکو۔ 25 فروری (اے پی پی) وزیراعظم محمد شہباز شریف صدر الہام علیوف نا سلہ غا 24آن 25 فروری اسکان آذربائیجان نا سرکاری دورہ ءِ کرے۔ دورہ ٹی پاکستان وآذربائیجان نا نیام اٹ تاریخی وایلمی تعلقداری تیا زور شاغنگا وہڑتوم آکنڈآتا تعلقداری تے پین سوگو کننگ کن ہڑتوم آملک آتا سرکڑدہ غاتا عزم انا درشانی ءِ کننگا۔دفترخارجہ غان جاری اعلامیہ نا رداٹ 24 فروری آ صدر الہام علیوف زگلباپیلس اٹی وزیراعظم ءِ بخیرکرے۔ تینا سرجم گپ وتران اٹی، ہڑتوم آ فریق آک تین پہ تینی است خواہی نا بشخ و ہڑتوم آ کنڈآتا کمکاری آ گپ وتران کریر و چندی بشخ آتیٹی کمکاری ءِ پین مون آدننگ نا است خواہی نا درشانی ءِ کریر۔ آذربائیجان نا صدر چندی اہم معاہدہ غاتیا دستخط کن وزیراعظم نا اپریل 2025اٹی دورہ ءِ پاکستان نا سلہ ءِ قبول کرے۔ ہڑتوم آراہشونک ہڑتوم آ ملک آتا نیام اٹ سٹریٹجک شریداری نا عزم انا درشانی ءِ کریر و سوگو سنگتی نا سوگو شونداری و سوگوی آ است جمی نا درشانی ءِ کریر۔ اوہڑتوم آ کنڈآتا واپار و زرکاری ءِپین ودفنگ و توانائی، انفراسٹرکچر، زرکاری و رابطہ نا بشخ آتیٹی اسیجائی زرکاری نا ڈٹ آتا پٹنگ نا اہمیت آہم زور شاغار۔ وزیراعظم جمہوریہ آذربائیجان نا ایکسپورٹ اینڈ انویسٹمنٹ پروموشن ایجنسی نا کمک اٹ اڈ ہلوک بزنس فورم اٹی بشخ ہلک۔ وزیراعظم اولیتی واپاری معاہدہ (پی ٹی اے) و ٹرانزٹ ٹریڈ ایگریمنٹ (ٹی ٹی اے) نانفاذ ءِ مون آتخا و داہم پارے کہ پاکستان اٹ آذربائیجان۔ پاکستان چیمبرآف کامرس اینڈ انڈسٹری نا بنا12 فروری 2025آ کننگانے۔ ہڑتوم آراہشونک کثیر الجہتی فورم خاص کر اقوام متحدہ و اوآئی سی آ ہڑتوم آملک آتا نیام اٹ فعال کمکاری آ است جمی نا درشانی ءِ کریر۔ وزیراعظم شہبا زشریف بھارتی کوزہ ٹی جموں وکشمیر نا ویل آ آذربائیجان نا پدریسہ اصولی موقف و کشمیری الس نا حق خودارادیت نا مخ تفی نا ستاءِ کرے، دُن کہ اقوام متحدہ نا سلامتی کونسل نا تعلقدار قراردادآتیٹی نوشتہ ءِ۔ وزیراعظم محمد شہباز شریف و صدرا لہام علیوف ہڑتوم آملک آتا نیام اٹ چندی بشخ آتیٹی کمکاری ءِ مون آ دننگ کن چندی معاہدہ و مفاہمت نا یات داشت آتیا دستخط نا دود اٹی بشخ ہلکر۔ وزیراعظم محمد شہباز شریف باکو ٹی نگورنوکاراباخ اٹی آزادی کن جنگ انا ہیروو شہید آتے خراج عقیدت پیش کننگ کن ’’یات گار فتح‘‘ نا دورہ ءِکرے۔ اوسویلی قفقا ز اٹی امن و سوگوی نا مون آ دننگ کن آذربائیجان نا کوشست آتیکن پاکستان نا بدل مفروک مخ تفی نا درشانی ءِ کرے۔ دورہ ٹی پاکستان و آذربائیجان نا نیام اٹ تاریخی و برادرانہ تعلقداری آ زور شاغنگا و ہڑتوم آ کنڈآتا تعلقداری تے پین سوگو کننگ کن ہڑتوم آملک آتا سرکڑدہ غاتا عزم انا درشانی ءِ کننگا۔
