باکو۔ 25 فروری (اے پی پی) وزیراعظم محمد شہباز شریف پارینے کہ پاکستان و آذربائیجان نا نیام اٹ کاروباری سرجزآتیان زرگزران سوگو مریک، ہڑتوم آملک آتانیام اٹ دفاعی بشخ اٹی کمکاری ءِ مون آ دننگک،پاکستان اٹ درملکی زرکارآتے زرکاری کن سازگار چاگڑد اس فراوان کننگ انگ ءِ ، ہڑتوم آملک آتا پوریاگرآتے پرکشش واپاری آسودہی آن بایدے فائدہ ہرفر، نارتھ ساؤتھ راہداری کاروباری سرجزآتا مون آ دننگ کن گیم چینجر اسے۔ داخیال آتا درشانی ءِ او پاکستان آذربائیجان بزنس فورم آن تران کرساکرے۔ داوخت آ آذربائیجان نا صدر الہام علیوف ہم ساڑی ئس۔ وزیراعظم محمد شہباز شریف پارے کہ پاکستان و آذربائیجان نا نیام اٹ اخلاص، تین پہ تینی پت و شرف و الس نا کہول آ مہرومریبت آ تالان متکن آ تعلقداری ءِ، آذری سرکڑدہ غاتون اوڑدہی ٹی گیشتر رداٹ تعمیری گپ وتران مس، نن مون آ ہِننگ آ دوٹوک امناکرین۔ اوپارے کہ پاکستان و آذربائیجان نا کاروباری تپہ غان تران کرسا خوشی مس، ننا ہڑتوم آکنڈآتا واپار 14 ملین ڈالر ءِ، نن اودے زوت 2 ارب ڈالر اسکان دینہ، دابارواٹی معاہدہ غاتے اسہ تُو اٹی گڈیکو دروشم اس تننگ آ امنا مسنے، پاکستان آن باسپتی برنج دوئی کننگک، آذربائیجان نا صدر درآمدی ڈیوٹی آن استثنی تسنے، داوڑنن مون آ ہِننگ کینہ، ہموبشخ آتا جاچ ءِ ہلینہ ہرافتے ٹی ٹیرف کم ءِ تانکہ درآمد و برآمد آتے ودفنگ مرے۔ وزیراعظم پارے کہ ایل این جی ہم واپاری گڑاتیٹی اوار ءِ، اگہ نن اواری اٹ کوشست کینہ تو 2 ارب ڈالر واپاری ہدف نا دوئی ممکن مریک۔ دامعاہدہ غاتیا اپریل اٹی پاکستان اٹی دستخط کننگک، ہڑتوم آملک آتا نیام اٹ واپاری سرجزآتا بابت غلط گمانی تے مر کننگ کن ہڑتوم آملک آتا نمائندہ غاتیا تالان آخبتی انفارمیشن بیورو اس جوڑ کننگک ہرا پوسکن آ آسراتی تیاتالان مریک ہراڑآن ہڑتوم آ ملک آتا پوریاگر آتے وخت آ و راستکی تیا تالان معلومداری دوئی مریک ۔ اوپارے کہ ہڑتوم آملک آتا نیام اٹ متکن آ سوگودفاعی تعلقداری ءِ، ہڑتوم آملک آتا نیام اٹ دفاعی بشخ اٹی کمکاری ءِ پین مون آ دننگک، ہڑتوم آملک آتا نیام اٹ اسیجائی ڈیفنس مینوفیکچرنگ فیسلیٹی اس جوڑ کننگ نا فیصلہ کننگانے۔ اوپارے کہ پت انا قابل، اڑزان ٹرانسپورٹیشن و رابطہ غاتا مون آدننگ کن نارتھ ساؤتھ کوریڈور اہم ءِ، دابابت فائدہ ئی گپ وتران مریک ، گوادرپورٹ ننا واپار نا مون آ دننگ اٹ اہم کڑد ادا کننگ کیک، دا گیم چینجر ڈٹ اسے ، ننا چکار داڑآٹی ءِ، آذربائیجان چیمبرآف کامرس اسلام آباد، لاہور و گوجرانوالہ ٹی جوڑ کننگانے، دا ہڑتوم آ کنڈآتا واپار نا مون آ دننگ اٹ اہم کڑد ادا کننگ ءِ، پاکستان چیمبر آف کامرس باکو تون اوار آذربائیجان نا چندی شارتیٹی کاریم کننگ ءِ، داڑآن ہڑتوم آملک آتا نیام اٹ واپار نا مون آ دننگ اٹی کمک رسینگک، آذربائیجان ، ترکیہ و پاکستان نا نیام اٹ مفاہمت غٹ انا فائدہ غاتیٹی ءِ، آذربائیجان اسلام آباد اٹی چاہندار آتا ٹیم اس گدریفے ہرا بنجائی دارالحکومت اٹی تزئین وآرائش کن پبی کاریم کننگ ءِ۔
