لاہور۔23فروری (اے پی پی): مزن وزیر محمد شہباز شریف لاہور ءَ چہ آذربائیجان ءِ دو روچی سرکاری تر ءُ تاب ءَ شتگ۔ مزن وزیر کارگس ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ مزن وزیر محمد شہباز شریف آذربائیجان ءِ صدر الہام علیف ءِ دعوت ءِ سر ءَ 24 ءَ بگر داں 25 فروری 2025 ءَ جمہوریہ آذربائیجان ءِ دو روچی سرکاری تر ءُ تاب ءَ کنت۔ مارچ 2024 ءَ مزن وزیر ءِ اگدہ ءِ سر ءَ نندگ ءَ پد اے مزن وزیر شہباز شریف ءِ آذربائیجان ءِ دومی تر ءُ تاب اِنت۔ مزن وزیر ءِ تر ءُ تاب ءِ وھد ءَ نائب مزن وزیر ءُ درئی کارانی وزیر محمد اسحاق ڈار ، بنجاھی وزیر جام کمال خان، عبدالعلیم خان، چوہدری سالک حسین، عطا اللہ تارڑ، ءُ ھاسیں کمکار طارق فاطمی ھم مزن وزیر ءِ ھمراھی ءَ بنت۔ تر ءُ تاب ءِ ساھت ءَ مزن وزیر آذربائیجان ءِ صدر ءِ گوما دو نیمگی گند ءُ نند کنت ءُ کاروباری فورم ءَ ھم گشتانک دنت۔ گند ءُ نند ءَ توانائی، تجارت، دفاع، وانگ ءُ زانگ، ءُ موسمیاتی بدلی ءِ پڑ ءَ دو نیمگی کمک ءَ را گیش کنگ ءِ واستہ وت مہ وتی دلچسپی ءِ شوبگ آنی سر ءَ تران کنگ بیت۔ اے تر ءُ تاب ءِ ساھت ءَ دوئیں ملک آنی نیام ءَ کمک ءِ بازیں شوبگ آنی تہ ءَ مفہوم منداشت ءُ معاہدہ آنی سر ءَ دستخط کنگ بیت۔ مزن وزیر ءِ تر ءُ تاب آذربائیجان ءِ گوما پاکستان ءِ سیادی ءَ را گیش مھکم کنگ، گیش اقتصادی کمک ءَ را گیش کنگ ءُ یکجائی دیمروئی ءِ واستہ شریکداری ءِ نوکیں راہ آنی شوھازگ ءِ واستہ پاکستان ءِ جزم ءِ درشان اِنت۔
