اسلام آباد۔22فروری (اے پی پی):متحدہ عرب امارات ءِ نائب مزن وزیر ءُ دری کارانی وزیر سینیٹر اسحاق دار ءَ وتی امارات ءِ ہم منصب شیخ عبداللہ بن زاید النہیان ءَ گوں گند ءُ نند کت ایشی ءِ تہا دیریں براتی سیادی ءَ را گیش مھکم کنگ ءِ بابت ءَ سرجمیں گپ ءُ تران کنگ بوت۔ متحدہ عرب امارات ءِ نائب مزن وزیر ءُ دری کارانی وزیر ءِ دعوت ءِ سر ءَ دوئیں نیمگاں ابوظہبی ءَ برجم داشتگیں گند ءُ نند ءَ تجارت، سرمایہ کاری، توانائی، دفاع ءُ مردم آنی نیام ءَ رابطہ ءَ ھوار کلیدی شوبگ آنی تہ ءَ دو نیمگی کمک ءَ را گیش کنگ ءِ امکانات آنی سر ءَ تران کت۔ دوئیں رہشوناں وت مہ وتی دلچسپی ءِ دمگی ءُ جھان ءِ مراگش آنی سر ءَ ھم تران کت ءُ امن، استحکام ءُ یکجائی وشھالی ءِ دیمروئی ءِ سر ءَ زور پر دات۔ سینیٹر اسحاق ڈار ءَ متحدہ عرب امارات ءِ سروکی ءَ را 11 ءَ چہ 13فروری 2025 ءَ دبئی ءَ جھان ءِ حکومتی سروک دیوان 2025 ءِ سوبمندیں برجم دارگ ءِ سر ءَ مبارکی دات ءُ جھان ءِ گپ ءُ تران ءُ کمک ءِ دیمروئی ءِ واستہ امارات ءِ دور اندیشیں گامگیج آناں ساڑات۔ آئی ءَ امارات ءِ گوما کثیر جہتی شریکداری ءَ را مھکم کنگ ءِ واستہ پاکستان ءِ جزم ءِ سر ءَ پدا زور دات ءُ امارات ءَ نندوکیں پاکستانی آنی کلیدی کرد ءِ سر ءَ زور پر دات ءُ آھاں دوئیں ملک آنی نیام ءَ یک پُل ءِ رنگ ءَ لیک اِت۔ سینیٹر محمد اسحاق ڈار ءَ پاکستان ءِ اقتصادی دیمروئی ءُ وشھالی ءِ واستہ برجاھیں کمک ءِ واستہ متحدہ عرب امارات ءِ ھم شگر ءُ منت گپت۔ ایشی ءِ پسو ءَ شیخ عبداللہ بن زاید النہیان ءَ پاکستان ءِ گوما وتی اسٹریٹجک سیادی ءَ را گیش مھکم کنگ ءِ واستہ امارات ءِ مھکمیں عزم ءِ پدا زور دات۔ آئی ءَ دمگی برجائی ءِ تہ ءَ پاکستان ءِ ھاسیں کرد ءَ را من اِتگ ءُ امارات ءِ دیمروئی ءِ تہ ءَ پاکستانی کمیونٹی ءِ جوانیں کرد ءَ را ساڑاتگ۔ دوئیں رہشون آنی تہ ءَ دو نیمگی سیادی ءَ را گیش مھکم کنگ ءُ وت مہ وتی مفاد ءِ دمگی ءُ میاں اوستمانی جیڈھ آنی سر ءَ ھمگرنچ کنگ ءِ واستہ باقاعدہ مزنیں تک ءِ رابطہ ءُ شور ءُ سلاھ آنی برجاہ دارگ ءِ سر ءَ تپاک کنگ بوتگ۔ گند ءُ نند جوانیں رنگ ءَ آسر بوتگ ات، دوئیں رہشوناں پاکستان ءُ امارات ءِ سیادی ءِ آیوکیں وھد ءُ یک وشھالیں، امن ءُ مھکمیں دمگ ءِ واستہ وتی یکجائی وژن ءِ سرجمی ءِ بابت ءَ وشھالی ءِ درشانی کتگ ات۔
